2024 წელს რუსეთიდან ფულადი გზავნილები 65%-ით, ანუ 987 მილიონი დოლარით შემცირდა. საქართველოს ეროვნული ბანკის სტატისტიკით, გზავნილების მოცულობამ 541 მილიონი დოლარი შეადგინა. 2023 წელს რუსეთიდან 1.5 მილიარდი დოლარის ფულადი გზავნილი განხორციელდა.
მთლიანად, სებ-ის სტატისტიკის მიხედვით, საქართველოში, გასულ წელს, ფულადი გზავნილების სახით 3.36 მილიარდი დოლარია გადმორიცხული. წინა წელთან შედარებით გზავნილების საერთო მოცულობის შემცირების მიზეზი, მეტწილად რუსეთის ფედერაციიდან ფულადი ნაკადების შემოდინების კლების შედეგია. ძირითად წყაროს 2024 წელს ევროკავშირის ქვეყნები წარმოადგენდა, საიდანაც წლიური ზრდა 10.2% იყო.
ქვეყნების მიხედვით, გზავნილებში პირველ ადგილს აშშ იკავებს, საიდანაც გასულ წელს 573 მილიონი დოლარი გადმორიცხეს, ეს თანხა 2023 წელთან შედარებით 24%-ით მეტი იყო. მეორე პოზიციაზეა იტალია 567 მილიონი დოლარის გზავნილების მოცულობით, საიდანაც შემოსული ფულადი ნაკადები 8%-ით გაიზარდა. 267 მილიონი დოლარი გადმორიცხეს 2024 წელს გერმანიიდან, რაც წლიურად 15%-ით არის გაზრდილი, საბერძნეთიდან გზავნილებმა 7%-ით, 263 მილიონ დოლარამდე იმატა, ისრაელიდან გზავნილები კი 249 მილიონი დოლარი იყო.
