დღეს თბილისში 19:00 საათზე სიღარიბის წინააღმდეგ მარში გაიმართება. მსვლელობა რესპუბლიკის მოედინად დაიწყება და პარლამენტთან გაჩერდება.
“ჩვენს ქვეყანაში სიღარიბესა და უთანასწორობას შეუძლებელია, ვინმე ვერ ხედავდეს.
ხალხში გამიზნულად გაჩენილი შუღლის მიუხედავად, ჩვენ ვიცით, რომ ერთმანეთის მხარდაჭერა და გაძლიერება შეგვიძლია. ჩვენ ვიცით, რომ ერთი საერთო ქვეყანა გვაქვს და გვინდა, სამართლიანი გახდეს – ისეთი, სადაც ბავშვები არ შიმშილობენ, მოხუცებს ღირსეული სიბერე აქვთ, ყველას ინტერესი დაცულია და ყველა თანასწორია კანონის წინაშე.
უთანასწორობა უსამართლობაა! – მარში სიღარიბის წინააღმდეგ.” – ნათქვამია გავრცელებულ ინფორმაციაში.
” ასე გამოიყურება სიღარიბე საქართველოში 
ოფიციალურად 440 890 ადამიანი სიღარიბის აბსოლუტურ ზღვარს ქვემოთ მყოფია. აქედან 144 126 ბავშვია, რაც იმას ნიშნავს, რომ ქვეყანაში ყოველი მე-6 ბავშვი შიმშილობს და საკვებზე, ტანსაცმელზე, გართობასა და განათლებაზე მხოლოდ ოცნებობს.
საარსებო მინიმუმად სახელმწიფომ 262,4 ლარი დაადგინა, რომელიც ერთ ადამიანს თვიდან თვემდე უნდა ეყოს იმისთვის, რომ შიმშილით არ მოკვდეს.
132 000 ადამიანს საარსებო მინიმუმზე ნაკლები ანაზღაურება აქვს.
16 წლამდე ასაკის 247 696 ბავშვი 200 ლარიან საარსებო შემწეობას იღებს.
ბოლო მონაცემით, სოციალური დახმარების მიღების სურვილი 1 272 572 ადამიანმა დააფიქსირა, რაც ქვეყნის მოსახლეობის 34,4%-ს შეადგენს. მათგან, 690 496 ადამიანი საარსებო შემწეობის მიმღებია.
864 312 პენსიონერი თვეში 350 ან 450 ლარიან პენსიას იღებს. წამლების შეძენისა და სესხის გადახდის შემდეგ, არსებობისთვის აუცილებელი მინიმუმიც არ რჩებათ.
261 741 შრომისუნარიანი ადამიანი ოფიციალურად უმუშევარია.
ერთი მილიარდერი ოლიგარქის, მრავალი მილიონერი პარლამენტარის, მათთან დაკავშირებული მულტიმილიონერი ბიზნესმენების, ჭიათურის, ტყიბულის, ოქროს საბადოების და ქვეყანაში არსებული უამრავი სხვა ბუნებრივი რესურსების ფონზე, 3,7 მილიონიან ქვეყანაში, თითქმის ნახევარი, 1,8 მილიონი ადამიანი უკიდურეს გაჭირვებაში და სიღარიბეში ცხოვრობს.” – წერს სოციალურ ქსელში სალომე სიმონია.
