ბიძინა ივანიშვილის რუსულმა სამარცხვინო რეჟიმმა გუშინ მოაწყო პოლიტიკოსებზე თავდასხმა და გაიტაცა ჩვენი თანამებრძოლი, პოლიტიკოსი ალეკო ელისაშვილი – დიახ, შავრაზმელებმა, ნიღბებიანებმა გაიტაცეს, – ამის შესახებ კოალიცია „ძლიერი საქართველოს“ ლიდერმა, მამუკა ხაზარაძემ ბრიფინგზე განაცხადა.
მისივე თქმით, თავდასხმის და ჩასაფრების მოწყობის არანაირი საჭიროება არ იყო.
„ბიძინა ივანიშვილის ხელისუფლებამ სრულიად დაკარგა სახე და გადავიდა ადამიანების მოტაცებაზე დღისით, მზისით. ამას ასრულებს პოლიციის ფორმაში გადაცმული კრიმინალთა ჯგუფი და ასრულებს [იმ მიზნით, რომ] თითქოს, დააშინოს ის მომიტინგეები და ახლა უკვე პოლიტიკოსები, რომლებიც ძალიან მყარად, ძალიან მტკიცედ დგანან ქვეყნის თავისუფლების სადარაჯოზე.
ბიძინა ივანიშვილის რუსულმა სამარცხვინო რეჟიმმა გუშინ მოაწყო პოლიტიკოსებზე თავდასხმა და გაიტაცა ჩვენი თანამებრძოლი, პოლიტიკოსი ალეკო ელისაშვილი. დიახ, გაიტაცა. შავრაზმელებმა, ნიღბებიანებმა გაიტაცეს. ამის არანაირი საჭიროება არ იყო და არანაირი თავდასხმის და ჩასაფრების მოწყობა არ იყო საჭირო. ეს თავდასხმა მოხდა „ტიტუშკების“ და ამ „ზონდერების“ მონაწილეობით, რომელსაც ძალიან წყნარად უყურებდნენ პოლიციელები. მინდა ყველა პოლიციელს ვუთხრა, რომ გადაცმული ადამიანები თქვენი რიგები უკვე არის იდენტიფიცირებული და ვერც ერთს ვერ გექნებათ საშუალება იმისათვის, რომ გააგრძელოთ მუშაობა ორგანოში მომავალში. ეს მომავალი ძალიან მალე დადგება, იმიტომ რომ თქვენ ასრულებთ დანაშაულებრივ დავალებებს, თქვენ არ ემსახურებით კანონს. თქვენ ასრულებთ ერთი კაცის ხუშტურებს, რომელსაც თქვენი ოჯახის წევრები მიჰყავს რუსეთში. თქვენ ასახიჩრებთ თავისუფლების მოყვარულ ახალგაზრდებს ყოველ საღამოს, იმისათვის, რომ დამატებით რაღაცა 500 ლარი ჩაიდოთ ჯიბეში. ყველა ხართ იდენტიფიცირებული“, – განაცხადა მამუკა ხაზარაძემ.
ოპოზიციონერი პოლიტიკოსი აცხადებს, რომ ბრძოლა ბოლომდე გაგრძელდება და ბიძინა ივანიშვილის დემონტაჟი დაწყებულია.
„ბიძინა, დამთავრებულია შენი საქმე. რამდენიმეჯერ გითხარი წყნარად, ახლაც წყნარად გიმეორებ. ამ ქვეყანას შენ ვერ გაარუსებ და ის 3 000 ზონდერი კაცი ვერ მოერევა იმ თავისუფლებას, რომელიც მეორე მხარეს არის,“ – განაცხადა ხაზარაძემ.
