„დღეს საფეხბურთო მატჩია და სავსებით გასაგებია, რომ იყოს თაღლითობა ფეხბურთის ბილეთების გაუგონარი ფასდაკლებით მიღებასთან დაკავშირებით“, – ამის შესახებ კიბერუსაფრთხოების ექსპერტმა ანდრო გოცირიძემ რადიო „პალიტრას“ გადაცემაში „თქვენი დრო“ განაცხადა.
როგორც ექსპერტი აღნიშნავს, რაც უფრო მივუახლოვდებით მატჩის დაწყების დრო და მაყურებელი დაკარგავს ბილეთის შოვნის იმედს, მით უფრო გახშირდება თაღლითური შეთავაზებები.
„ფიშინგთან და სოციალურ ინჟინერიასთან ჩვენი საუკეთესო მოკავშირე არის საღი აზრი. ასეთი რეცეპტი, როგორ უნდა ვუმკურნალოთ ამგვარ მომენტებს არ არსებობს, მაგრამ უნდა გადავამოწმოთ, რამდენად რეალურია თავად პიროვნება, ვის ჰყავს მას მეგობრებში, თაღლითობისთვის სპეციალურად შექმნილი ექაუნთი ხომ არ არის, ყოველთვის ეჭვის შემცველია არარეალური ფასდაკლება“, – დასძინა მან.
„რაც უფრო მივუახლოვდებით მატჩს ბილეთის ფასი გაიზრდება, შესაბამისად, თუ ახლა ჩვენ ვინმე ბილეთს შემოგვთავაზებს იმ ფასად, რა ფასადაც სალაროში უნდა გაყიდულიყო, დიდი ალბათობით, ეს შეიძლება იყოს თაღლითობა. სჯობს, ეჭვის საფუძველზე თავი შევიკავოთ ჩვენთვის მომგებიანი გარიგებისთვის, გავითვალისწინოთ რამხელა ზარალი უნდა მივიღოთ. ეს არ არის მხოლოდ 100 ლარის სადღაც გადარიცხვა, რომელსაც გადავიტან. ეს ნიშნავს იმას, რომ შესაძლო ინფიცირების შედეგად კომპიუტერს აბსოლუტურად სხვა დაეუფლოს და გაიგოს ჩვენი პერსონალური ინფორმაცია. ეს საკმაოდ დიდი რისკის შემცველია“, – განაცხადა ანდრო გოცირიძემ.
