სახლები აღარ დგას დღეს უკვე, ჩაცვივდნენ უბრალოდ, მიწაში იმარხება ნელნელა შუქრუთი და ითხვისი – წერს ჭიათურის სოფლების შესახებ, სოციალურ ქსელში, ფოტოგრაფი მარიამ ნიკურაძე.
“ჭიათურიდან ვბრუნდები ისევ გაოგნებული, სულ მგონია, რაღამ უნდა გამაკვირვოს აქ, მაგრამ მაინც.
თუ მოვასწარი, საღამომდე დავდებ ფოტოებს იმ სახლების, რომლებიც ადრე მქონდა გადაღებული და აღარ დგას დღეს უკვე, ჩაცვივდნენ უბრალოდ. მიწაში იმარხება ნელნელა შუქრუთი და ითხვისი.2019 წელს დაიწყო ეს პროტესტი, მაშინ დავათვალიერე ეს ადგილები პირველად. მის მერე უამრავჯერ ვიყავი, მაგრამ დღეს ზოგი ადგილი ვერ ვიცანი, სრულიად შეცვლილია ზედაპირი, მდელოს ნაცვლად ხევია ზოგან.საღამოს მეტ ინფოს დავდებ მოკლედ, დღეს შვებულებაში უნდა გავსულიყავი, მაგრამ ჩემი ქომითმენთი ამ პროფესიის მიმართ რომ გაიგოთ, ვერ მოვითმინე და ამოვედი :დ ახლა უნდა დავბრუნდე, ჩავალაგო და საღამოს ქუთაისში მოვდივარ აეროპორტში :დ აი, ერთი დღეში დასავლეთში ორჯერ ჯერ არ წავსულვარ არასდროს.
ჯორჯიან მანგანეზს ახალი მწვერვალები დაუპყრია ამასობაში.” – წერს ფოტოგრაფი მარიამ ნიკურაძე სოციალურ ქსელში.
ჭიათურის მუნიციპალიტეტში პროტესტის მეორე დღეა მიმდინარეობს. სოფელ შუქრუთში, ადგილობრივებმა კარვები გაშალეს და კომპანია “ჯორჯიან მანგანეზს” ადეკვატური კომპენსაციის გადახდას სთხოვენ.
მოსახლეობის თქმით, მათი კერძო საკუთრების ქვეშ, მიწის სიღრმეში კომპანია წლების განმავლობაში მანგანუმს მოიპოვებდა, რის შედეგადაც საცხოვრებელი სახლები დაზიანდა, ეზოები კი დაიმეწყრა. აქციის მონაწილეების განმარტებით, ისინი პროტესტის შეწყვეტას არ აპირებენ.
“მოთხოვნა იყო, რომ ზარალი აენაზღაურებინათ, თუმცა ერთი ლარი არ ანაზღაურებულა” – ამბობს აქციის ერთ-ერთი მონაწილე
პროტესტის მონაწილეებს “ჯორჯიან მანგანეზმა” წერილობით უპასუხა, სადაც აღნიშნულია რომ, ადგილობრივებს კომპენსაცია უკვე აღებული აქვთ. კომპანიის განცხადებითვე, გარკვეულმა ჯგუფებმა თვითნებურად, კანონდარღვევით შეაფერხეს სამუშაო პროცესი.
