გარდაიცვალა ცნობილი ქუთაისელი ფოტოგრაფი და მთასვლელი ჯემალ სირბილაძე

გარდაიცვალა ცნობილი ქუთაისელი ფოტოგრაფი და მთასვლელი ჯემალ სირბილაძე.

“ჯემალ სირბილაძე აფხაზეთის ომის ფოტომემატიანე იყო, მან შემოგვინახა იმ დღეების შესანიშნავი კადრები, ნამდვილი ფოტოდღიურები. ქუთაისის თემატიკა კიდევ სხვაა, რამდენი საინტერესო თემა აქვს გადაღებული. სამწუხაროდ, სრულიად დაუფასებელი წავიდა ეს დიდი პროფესიონალი, უწყინარი და თავმდაბალი ადამიანი! ვწუხვარ და მენანება, უფალმა გაანათლოს ჩვენი ჯემალი” – წერს ჟურნალისტი ნანული ცხვედიანი
“რომ არა ჯემალი, არ მეცოდინებოდა თითქმის ყოველი დღე ჩვენი ბავშვობისა, ვერ “გამოვიჭიმებოდი” სამი წლის პატარა გოგო ფოტოგამოფენაზე, ვერ მექნებოდა ამდენი ბავშვური მოგონება აი, ამ ობიექტივის წინ გავიარე ბავშვობა, სული მიმდიოდა რომ ამოიღებდა გულის ჯიბიდან და ყურებამდე ვუღიმოდი ნამდვილად ბედნიერი ალბათ ყველაზე მეტად ამ ობიექტივის წინ ვიკრიჭებოდი მართლა რაღაცნაირად მიფრიალდებოდა გული რომ დავინახავდი ამ აპარატს და ახლაც ზუსტად ისე ამიფრიალდა ჩემი ტკბილი არაყიშვილელი მეზობელი, რომელიც სულ ჩვენი ტოლი იყო და რომელიც ახლა მართას და ნინას ტოლია და ისევ აგროვებს ჩვენი ეზოს კადრებს” – წერს თიკო ლეთოდიანი სოციალურ ქსელში.
“ქუთაისის დავით მხეიძის სახელობის ფოტო-კინო მატიანის მუზეუმი ღრმა მწუხარებას გამოთქვამს მუზეუმის ყოფილი თანამშრომლის, ფოტოგრაფისა და ალპინისტის ჯემალ სირბილაძის გარდაცვალების გამო. ვუსამძიმრებთ გარდაცვლილის ოჯახსა და ახლობლებს.” – წერს ქუთაისი ფოტო-კინო მატიანეს მუზეუმი სოციალურ ქსელში.

ჯემალ სირბილაძემ ქართველი მეომრების სახეები აღბეჭდა. მას გადაღებული აქვს აფხაზეთისა და 2008 წლის ომები.

1981 წელს ქუთაისელმა კინოოპერატორმა ჯემალ სირბილაძემ გადაიღო მოკლემეტრაჟიანი მხატვრულ – დოკუმენტური ფილმი, რომელიც ასახავს შემოდგომის ქუთაისს. ფილმში დაფიქსირებულია ქალაქის ცენტრალური უბნები, ქუჩები, შენობა – ნაგებობები, რეკრეაციული ადგილები, პარკები და ზოგადად ქალაქის ყოფა. რეალური სიზუსტითაა გადმოცემული შემოდგომის ქუთაისის ამინდის მკვეთრი ცვალებადობა და მასთან დაკავშირებული ყოფითი და სიტუაციური დეტალები.