დონეცკის ე.წ. უზენაესმა სასამართლომ 22 წლის ქართველ მებრძოლს, მამუკა გაწერელიას, რომელმაც სამი რუსი ჯარისკაცი მოკლა, სამუდამო პატიმრობა მიუსაჯა. ამის შესახებ რუსული პროპაგანდისტული გამოცემა Lenta.ru პროკურატურაზე დაყრდნობით წერს.
ის დამნაშავედ ცნეს 359-ე (დაქირავებული პირის მონაწილეობა შეიარაღებულ კონფლიქტში) და 317-ე (ჯარისკაცის სიცოცხლეზე ხელყოფა იმ მიზნით, რომ ხელი შეუშალოს მის კანონიერ საქმიანობას, საზოგადოებრივი უსაფრთხოების უზრუნველსაყოფად) მუხლებით.
- რუსეთის პროკურატურის მიხედვით: გაწერელია უკრაინის ტერიტორიაზე 2022 წლის მარტში ჩავიდა და კონტრაქტი გააფორმა უკრაინის შეიარაღებულ ძალებთან, რის შემდეგაც გაიარა მომზადება და გაგზავნეს მარიუპოლში. 2022 წლის 1 აპრილს, საბრძოლო პოზიციაზე, ბინაში ცეცხლი გაუხსნა ოთხ რუს ჯარისკაცს, რომელთაგან სამი მოკვდა. ორი კვირის შემდეგ, სხვა საბრძოლო პოზიციაზე, გაწერელიამ რუსეთის შეიარაღებული ძალების სამხედრო მოსამსახურეების ჯგუფს ორი ყუმბარა ესროლა.
ამერიკის ხმის ინფორმაციით, გაწერელია აზოვსტალის დაცვაში მონაწილეობდა. ის აფხაზეთიდან დევნილია. მამუკა გაწერელია ტყვედ 2022 წლის 20 მაისს ჩავარდა, როცა მარიუპოლში, მტრის ალყაში მოქცეული, უკრაინის არმიის ქვედანაყოფები პრეზიდენტ ზელენსკის ბრძანებას დაემორჩილნენ და აზოვსტალი დატოვეს.
“2022 წლის დასაწყისში გაწყვიტა კონტრაქტი საქართველოს თავდაცვის სამინისტროსთან და მარტში წავიდა მოხალისედ უკრაინაში. საკუთარი სურვილით. სწამდა რომ ეს იყო ბრძოლა საქართველოსთვის. შემდეგ, როცა მარიუპოლში ვითარება გართულდა, ასევე საკუთარი ინიციატივით შეუერთდა აზოვსტალის დამცველებს. 8 დეკემბერს, ტყვეობაში 22 წლის გახდა”, — უთხრა მამუკა გაწერელიას დედამ ამერიკის ხმას.
