შესაძლოა, ექიმი ვალდებული გახდეს ფარმაცევტული კომპანიისგან მიღებული თანხის შესახებ ინფორმაცია გაასაჯაროოს. ამის შესახებ ჯანდაცვის სამინისტროს სტრატეგიული განვითარებისა და ანალიტიკის დეპარტამენტის უფროსმა ლელა სულაბერიძემ „რადიო პალიტრისა“ და „პალიტრანიუსის“ გადაცემაში „საქმე“ ისაუბრა.
მისი თქმით, სამინისტრო რეცეპტების მონიტორინგს ახორციელებს, სადაც საკვები დანამატებისა და ვიტამინები საკმაოდ დიდი რაოდენობით ხვდება.
„საკვები დანამატები და ვიტამინები არ გახლავთ “სამკურნალწამლო” დანიშნულების. ეს არ არის კონკრეტული დაავადების სამკურნალო საშუალება. აქედან გამომდინარე, ამ ტიპის მედიკამენტებზე, არსებობს ასეთი გავრცელებული პრაქტიკა, რასაც სხვა ქვეყნებიც იყენებენ და არეგულირებენ ამ საკითხს (ჯერჯერობით კონსენსუსი არ არის მიღწეული საერთაშორისო დონეზე), ეს არის გამოწერების, რეცეპტების მონიტორინგი, რომელსაც ასევე ახორციელებს სამინისტრო. საკმაოდ ხშირია ამ ტიპის მედიკამენტების არსებობა რეცეპტებში. ამ კუთხით ანალიზი კიდევ უფრო აქტიური იქნება. შესაბამის სარეკომენდაციო ხასიათის შეხვედრებს სამინისტრო ექიმებთანაც გეგმავს.
ამ კუთხით ერთ-ერთი საინტერესოა ე.წ „სანშაინ” აქტი, რომელიც საფუძველს აშშ-დან იღებს, ეს არის გამჭვირვალობის აქტი და თითოეული ექიმისა, თუ სამედიცინო პერსონალისთვის, ფარმაცევტული კომპანიების მხრიდან ჩარიცხული თანხები, კონკრეტული მედიკამენტების რეალიზაციის სანაცვლოდ ( ან, თუნდაც არ იყოს რეალიზაცია და იყოს კონკრეტული მედიკამენტის შესახებ ინფორმაციის მიწოდება), ამ ტიპის პროცედურებს ასაჯაროებს. ამაზეც არის მსჯელობები, რომ მსგავსი ტიპის რეგულაცია შესაძლოა, უახლოეს მომავალში საქართველოშიც დაწესდეს და მეტად გამჭვირვალე გახდეს თითოეული სამედიცინო პერსონალისთვის ანაზღაურების ნაწილი“,- განაცხადა ლელა სულაბერიძემ.
ცნობისთვის, ჯანდაცვის მინისტრის ზურაბ აზარაშვილის განცხადებით, ქვეყანაში არის ტენდენცია, როდესაც ისეთი მედიკამენტების, რომლებიც რეცეპტული არ არის და შეიძლება ბიოლოგიურად აქტიურ დანამატებს ან ვიტამინებს ეხებოდეს, ფასებიც იზრდება და რეცეპტებში ამას ხელოვნურად წერენ.
“ახლა კიდევ დამატებით ტენდენციაა, სამწუხაროდ, როდესაც ისეთი მედიკამენტების, რომლებიც რეცეპტული არ არის და შეიძლება ბიოლოგიურად აქტიურ დანამატებს ან ვიტამინებს ეხებოდეს, ფასებიც იზრდება და რეცეპტებში ამას ხელოვნურად წერენ. იმიტომ, რომ მოსახლეობას იმ შემცირებული მედიკამენტების დანახარჯების ფონზე, მაინც მოუწიოს ასეთ დანამატებზე, სხვა მედიკამენტებზე და მსგავს ვიტამინებზე ფასების გადახდა. თუმცა ამაზეც გვექნება და გვაქვს ყოველთვის მკაცრი რეაგირება“,- განაცხადა ზურაბ აზარაშვილმა.
