რამდენიმე დღიანი ნალექის შემდეგ, ქუთაისის მე-20 ბაგა-ბაღის ჭერი დაზიანდა. ბაღის გამგის თქმით, დილით ადრე აღსაზრდელების მოსვლამდე ოთახი დატბორილი დახვდათ და ჩამობერილი ჭერის ფრაგმენტები ჩამოყარეს. შემთხვევის შედეგად არავინ დაშავებულა.
მშობლები შეშფოთებული არიან და ქალაქის მერიისაგან შვილებისათვის უსაფრთხო გარემოს უზრუნველყოფას მოითხოვენ.
“მოვიყვანე ბავშვი, ზეიმი ჰქონდა. რომ შემოვედი ჯგუფში, ჭერის მასა იყო იატაკზე დაყრილი. სხვა ოთახებში წვიმა ჩამოდიოდა და იქ ბავშვების გაჩერება იყო შეუძლებელი, თორემ იქ ბავშვები არ ყოფილან…დაკეტონ დროებით. იქნება ეს ორი თუ სამი თვე. მოგვხედონ, გააკეთონ და იყოს, შესაბამისად, მოწესრიგებული,” – ამბობს ერთ-ერთი მშობელი ეკა რუხაძე.
ქუთაისის „ბაგა-ბაღების“ გაერთიანების ხელმძღვანელის დავით წიტაიშვილის თქმით, შენობის გადახურვა უახლოეს მომავალში იგეგმება.
