ზესტაფონში კულტურისა და დასვენების პარკში ინფრასტრუქტურა განახლდება. როგორც ზესტაფონის მუნიციპალიტეტის მერიიდან იუწყებიან,
რეაბილიტაციის ფარგლებში, პარკში არსებული ინფრასტრუქტურა სრულიად შეიცვლება. დამონტაჟდება განათების ახალი სისტემა, დამატებით განთავსდება სკამები და დეკორატიული ურნები. იგეგმება სპორტული, სავარჯიშო ინვენტარის მონტაჟიც. კულტურისა და დასვენების პარკში, უფასო ინტერნეტიც გაკეთდება. WI – FI ინტერნეტ კავშირით სარგებლობა 7 სხვადასხვა ადგილზე დღეში 2 საათის განმავლობაში იქნება შესაძლებელი.
“განახლებული პარკი საინტერესო იქნება ყველასთვის. განსაკუთრებით ახალგაზრდებისთვის. ჩვენი სურვილია, რომ მათ შევუქმნათ გარემო, სადაც შეძლებენ დასვენებას, გართობას და დაკავდებიან სპორტით. ამ მიმართულებით კიდევ ბევრი სიახლეების განხორციელებას ვგეგმავთ“,-განაცხადა ზესტაფონის მერმა გიორგი გოგლიჩიძემ.
ინიციატივა ზესტაფონის მერს, გიორგი გოგლიჩიძეს ეკუთვნის, რომელმაც პარკში მიმდინარე სამუშაოები მოადგილესთან, ელგუჯა კვეტენაძესთან და საკრებულოს თავმჯდომარესთან, ვახტანგ ღამბაშიძესთან ერთად დაათვალიერა.
