წყნეთში, დენის დარტყმის შედეგად დაღუპული მოზარდი ახალგაზრდა კალათბურთელი დათუნა ჟღენტია.
საქართველოს კალათბურთის ეროვნული ფედერაცია ღრმა მწუხარებას გამოთქვამს ახალგაზრდა კალათბურთელის, დათუნა ჟღენტის ტრაგიკულად გარდაცვალებასთან დაკავშირებით!
ტრაგედია წყნეთში გასულ ღამეს დატრიალდა. დენის დარტყმის შედეგად 16 წლის ბიჭი დაიღუპა. უბედური შემთხვევა ე.წ სამთავრობო ზონაში მოხდა. სკვერში, ახლადმოწყობილ ფარდულში მოზარდები თამაშობდნენ, ერთერთ მათგანს კი დენმა დაარტყა, მის გადარჩენას თანატოლები და ადგილობრივები ცდილობდნენ თუმცა ბიჭი სასწრაფო დახმარების მისვლამდე გარდაიცვალა.
16 წლის მოზარდი წყნეთში სტუმრად იმყოფებოდა. არსებული ინფორმაციით, დაშავდნენ სხვა მოზარდებიც, თუმცა მათ ჯანმრთელობას საფრთხე არ ემუქრება.
სკვერში კი სადაც ტრაგედია მოხდა ინფრასტრუქტურული სამუშაოები მიმდინარეობდა. ვაკის გამგეობამ მომხდართან დაკავშირებით განცხადება გაავრცელა, სადაც ნათქვამია, რომ ფანჩატურში, სადაც შემთხვევა მოხდა, უკანონოდ, კუსტარულად იყო დამონტაჟებული ელექტრომოწყობილობა.
გამგეობა აცხადებს, რომ ინფორმაცია, თითქოს მოზარდის გარდაცვალება სკვერში მიმდინარე ინფრასტრუქტურულ სამუშაოებს უკავშირდება, სიცრუე და თბილისის მუნიციპალიტეტის დისკრედიტაციის მცდელობაა.
მომხდარზე შსს-მ გამოძიება სისხლის სამართლის კოდექსის 240-ე მუხლით დაიწყო, რაც რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს, რასაც ადამიანის გარდაცვალება მოჰყვა.
შემთხვევა წყნეთში 10 ივლისს, გვიან ღამით მოხდა.
