შვილების ფოტო გამოქვეყნებულია მშობლის თანხმობით
“7 წლის პატარა გოგომ მამის გამო, ლოცვა ისწავლა და ყოველ დილა-საღამოს მამის გადარჩენისთვის ლოცულობს. ამბობს, რომ როგორც ფილმებში ხდება, ისიც დარეკავს სადღაც, შველას ითხოვს და მშობელს ასე გადაარჩენს. თავისი პატარა ხელებით წერილიც დაწერა – გვიშველეთ, მამა გადამირჩინეთო. დაწერა, მაგრამ არ იცის, ვინ დაეხმარება და სად უნდა გაგზავნოს, ამიტომ სახლში ინახავს” – ასე იწყებს “პრაიმტაიმთან“ საუბარს 7 წლის ნიას სათხოვარზე ორი შვილის დედა, ანი მაისურაძე.
მისი მეუღლე უმძიმეს დაავადებას ებრძვის, მას ზურგის ტვინის ავთვისებიანი სიმსივნე დაუდგინდა. სანამ ოჯახს მატერიალური შესაძლებლობა ჰქონდა, მკურნალობის ხარჯებს დამოუკიდებლად უმკლავდებოდნენ, მაგრამ ახლა, ამ ახალგაზრდა კაცის სიცოცხლე მხოლოდ კეთილ ადამიანებზეა დამოკიდებული. ანი ამბობს, რომ მისი მეუღლე, 35 წლის გიორგი ვეღარც წვება, სუნთქვა უჭირს და ყოველ წუთს შეიძლება ამან სავალალო შედეგამდე მიიყვანოს…
სიმსივნის ეს ფორმა იშვიათია, საქართველოში ნეიროქირურგები ოპერაციის გაკეთებაზე უარს ამბობენ. ამიტომ, მისი საზღვარგარეთ წაყვანა ერთადერთი გამოსავალია. ოჯახს ღირებული რაც გააჩნდა, უკვე გაყიდეს. მხოლოდ გიორგი მუშაობდა, ანი ბავშვებს ზრდიდა, ისინი ორი შვილის – 7 წლის და 2 წლის პატარების მშობლები არიან. გარდა ამისა, მათთან ერთად გიორგის მშობლები ცხოვრობენ, დედამთილსაც ავთვისებიანი სიმსივნე აქვს… გიორგის ოჯახის სარჩენად ფიზიკური მუშაობა უწევდა.
მეუღლე შიშობს, რომ მატერიალურ გასაჭირს, ჯანმრთელობის პრობლემას და სტრესს მისი ქმარი ვეღარ გაუძლებს და თავს რაიმეს აუტეხავს…
“იმდენად რთულ მდგომარეობაში ვართ, რომ რამ უნდა ვთქვა, დახმარება ვის უნდა ვთხოვო, ამაზეც ვერ ვფიქრობ. მთელი ღამეები ქმრის სუნთქვას განაბული ვისმენ, რათა დავრწმუნდე, რომ ნამდვილად სუნთქავს. სიმსივნე იმდენად დიდია, რომ გულზე აწვება და ჰორმონის საშუალებით სულ მცირე ჰაერს იღებს.
ჩვენი პატარა მხოლოდ 2 წლისაა და არ იცის, რა მძიმე მდგომარეობა გვაქვს ოჯახში. დიდსაც ვუმალავდით, მაგრამ ახლობლები რომ მოდიან, ან ტელეფონზე ვსაუბრობ ესმის, რა თქმა უნდა, მან იმ საშიშროების მთელი სიმძაფრის შესახებ არაფერი იცის, რაც შესაძლოა მოხდეს თუ თანხის მობილიზებას ვერ შევძლებთ.
7 წლის გოგონაა, ლოცვა სპეციალურად მამის დასახმარებლად ისწავლა. დილას და საღამოს ლოცულობს. ფილმებში უნახავს, რომ 112-ზე პატარები რეკავენ და საფრთხისგან მშობლებს ასე გადაარჩენს. ამ სცენის ნახვის შემდეგ, შთაგონებულმა წერილი დაწერა, სადაც მამის გადარჩენაში დახმარებას მთელი გულით ითხოვს. არ ვიცი, ვის გავუგზავნო და როგორ მივაგნო, ვინ მამას გადამირჩენსო, ცრემლიანი დიდი თვალებით მითხრა ჩემმა გოგომ.
სახლში დედამთილ-მამამთილი მყავს. რამდენიმე თვის წინ, დედამთილსაც ოპერაცია გავუკეთეთ, მასაც ავთვისებიანი სიმსივნე აქვს. ყველაფერი გავყიდეთ, რაც გაგვაჩნდა. მამამთილის პენსიით ვარსებობთ. მე უმუშევარი ვარ, რა თქმა უნდა, ჩვენი შესაძლებლობებით ქმარს მხოლოდ მოვკლავთ, თორემ რას ვუშველით?!
ჯიუტად გვჯერა, რომ კეთილი ადამიანები არსებობენ, რომ ჩვენი ოჯახის გასაჭირს გულთან მიიტანენ. ვიცი, ჩვენს მსგავსად, რამდენი გაჭირვებულია, რამდენი ითხოვს და რამდენს ეხმარებიან. არც კი ვიცი, რა არგუმენტი უნდა მოვიყვანო, ჩვენ რატომ უნდა გამოგვიწოდონ დახმარების ხელი, მაგრამ მაინც ვითხოვ, ვემუდარები ყველას, ვისაც ეს შეუძლია…
საქართველოში ამ დიაგნოზს არ მკურნალობენ, ან თურქეთში უნდა წავიყავნოთ, ან ისრაელში, დღეს კლინიკებიდან პასუხებს ველოდებით და მეშინია თანხის იმ ციფრების ნახვა, რომელიც იქ ეწერება…
ჩემი პატარა გოგოები უბრძოლველად როგორ დავაობლო?! იქნებ კეთილი ადამიანების დახმარებით და ჩემი ნიას ლოცვით, უფალმა მისი გადარჩენა ინებოს?! მე კი სულ რაღაცის მეშინია, უსახსრობის, უყურადღებობის, სიკვდილის, საყვარელი ადამიანის დაკარგვის, რომელიც თავს იმდენად უხერხულად გრძნობს, რომ შესაძლოა, თავს რაღაც აუტეხოს”- ამბობს ანი მაისურაძე.
დახმარების მსურველებმა გთხოვთ ნებისმიერი ოდენობის თანხა, თუნდაც 1 ლარი შემდეგ ანგარიშის ნომერზე გადარიცხოთ:
GE58BG0000000678225900 – საქართველოს ბანკი, მიმღები: ანი მაისურაძე
GE09TB7352245064300019 – თიბისი ბანკი, მიმღები: ანი მაისურაძე
წყარო: Primetime.ge
