არა, 26 მაისს მსგავსს ვერ განახორციელებენ. შემიძლია სრული პასუხისმგებლობით გითხრათ, რომ მიმიწვდება შესაბამის ინფორმაციაზე ხელი, მაქვს ეს მონაცემები, რომ ისინი ვერაფერს იზამენ, – ასე უპასუხა ვიცე-პრემიერმა, სამართალდამცავი სტრუქტურების კოორდინაციის საკითხებში სახელმწიფო მინისტრმა მამუკა მდინარაძემ კითხვას, ელიან თუ არა 26 მაისს სცენარების იმგვარ განვითარებას, როგორც ეს 2025 წლის 4 ოქტომბერს იყო.
მდინარაძე დარწმუნებულია, რომ 26 მაისს 4 ოქტომბრის მსგავსი მოვლენები ვერ დაიგეგმება.
„4 ოქტომბერს გაცილებით სერიოზულად გვქონდა საქმე, მაშინ სახელმწიფო ინსტიტუტებმა მოახერხეს, რომ დიდი უბედურება აგვეცილებინა თავიდან. ჩვენ მაშინ შევძელით, რომ იმავე დღეს დაგვესრულებინა ყველაფერი, როგორც მოსალოდნელი ამბოხის მოთავეები და გადატრიალების მოთავეები ყოფილიყვნენ დაკავებულები, ასევე აბსოლუტურად ყველა, ვინც კი ქმედითად იღებდა მონაწილეობას, ან შესაძლოა მიეღო, ყველა იყო განეიტრალებული წინასწარ. ეს იყო დიდი უწყებების მიერ ერთობლივად ჩატარებული ღონისძიება და ამან პოზიტიური შედეგი გამოიღო, ყველაფერი დამთავრდა მშვიდად და წყნარად. მსგავსი 26 მაისს ვერ დაიგეგმება“,- განაცხადა მდინარაძემ.
ამასთან, მდინარაძემ ისაუბრა ოპოზიციაზეც. მისი თქმით, ოპოზიციას შორის განხეთქილება რომ არ იყოს, ეს იქნებოდა გასაკვირი.
„რომ არ იყოს განხეთქილება, ეს იქნებოდა გასაკვირი, გამომდინარე იქიდან, რომ მათ არ აქვთ იდეური ერთობა. რა საკითხთან დაკავშირებითაც მათ აქვთ იდეური ერთობა, ერთადერთ საკითხთან დაკავშირებით აქვთ და იმას საჯაროდ ვერ იტყვიან, ვერ გაამხელენ, ეს არის ხელისუფლებაში მოსვლა, ძალაუფლების ხელში ჩაგდება და გარე დავალებების შესრულება. მსოფლიოში არ არსებობს პოლიტიკოსი, რომელიც ამას აღიარებს. ამიტომ ამ ერთადერთი იდეური ერთობის გარშემო ისინი ვერ შეიკრიბებიან, საჯაროდ ვერ განაცხადებენ. დანარჩენი, მათ რეალური იდეური ერთობა, ერთობა და იდეა, რომელიც გააერთიანებდა და ამისი გამხელა შეეძლებოდათ, მათ არ აქვთ, ამიტომ დაპირისპირება არის ბუნებრივი მოვლენა და ამას ვერც ჩვენ, არც ჩვენ და ვერც ისინი აღუდგებიან წინ“, – განაცხადა მდინარაძემ.
ცნობისთვის, 26 მაისს ოპოზიცია მასშტაბურ აქციას აანონსებს. ოპოზიციური პარტიების ინფორმაციით, მსვლელობა 19:00 საათზე თსუ-დან დაიწყება და პარლამენტის შენობამდე მივა, სადაც მოწყობილი იქნება სცენა.
