ევროკავშირმა და ჯანმრთელობის მსოფლიო ორგანიზაციამ საქართველოს 300 სამედიცინო მაცივარი და სპეციალიზებული ვაქცინაციის ავტომობილი გადასცა. დაავადებათა კონტროლის ეროვნული ცენტრის ინფორმაციით, ეს მხოლოდ მცირედი ჩამონათვალია იმ დახმარების, რომელსაც ევროკავშირი უწევს საქართველოს COVID-19 პანდემიასთან გასამკლავებლად და მასობრივი ვაქცინაციის მხარდასაჭერად, მათ შორის ყველაზე დაუცველ ჯგუფებს შორის.
დაავადებათა კონტროლისა და საზოგადოებრივი ჯანმრთელობის ეროვნულ ცენტრს მოწყობილობების გადასაცემად ესტუმრნენ საქართველოში ევროკავშირის დელეგაციის პროგრამების მიმართულების ხელმძღვანელის მოადგილე კატალინ გერმანი, ოკუპირებულ ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველი მოადგილე თამარ გაბუნია და ჯანმრთელობის მსოფლიო ორგანიზაციის საქართველოს ოფისის ხელმძღვანელი, სილვიუ დომენტე.
“აღჭურვილობასთან, მედიკამენტებთან, ტესტებთან და სხვა მოწყობილობებთან ერთად ეს 300 მაცივარი არის კიდევ ერთი დასტური ევროკავშირის მალისხმევისა, რათა დაეხმაროს საქართველოს წარმატებით გაუმკლავდეს COVID-19 პანდემიას, ჯანმრთელობის მსოფლიო ორგანიზაციასთან ერთად, ჩვენ ვდგავართ ქართველ ხალხთან და ვართ საქართველოს ჯანდაცვის სისტემის გაძლიერების მომხრენი”, – განაცხადა კატალინ გერმანმა.
ჯანდაცვის მინისტრის პირველი მოადგილის თამარ გაბუნიას განცხადებით, Covid-19-თან ბრძოლის პროცესში ევროკავშირი და ჯანმრთელობის მსოფლიო ორგანიზაცია საქართველოს ძალიან დიდი დახმარებას უწევს.
“დღეს მათ გადმოგვცეს სამედიცინო მაცივრები და ვაქცინის გადამზიდავი სპეციალური ტრანსპორტი, რაც ხარისხიანი ვაქცინის უსაფრთხოდ მოწოდების პროცესს გაამარტივებს. ვაქცინაციის პროგრამის დაგეგმვის, ასევე განხორციელების პროცესში ევროკავშირი და ჯანმო სამინისტროს ერთგული პარტნიორია. ამისათვის, კიდევ ერთხელ, მინდა დიდი მადლობა ვუთხრა მათ“, – აღნიშნა თამარ გაბუნიამ.
დაავადებათა კონტროლის ეროვნული ცენტრის ინფორმაციით, დღევანდელი ღონისძიება ნაწილია იმ მხარდაჭერის, რომელსაც ევროკავშირი და ჯანმო უწევს საქართველოს. პანდემიის დაწყებიდანვე ევროკავშირი და ჯანმრთელობის მსოფლიო ორგანიზაცია საქართველოს COVID-19-ით გამოწვეული კრიზისის დაძლევასა და ზოგადად, ჯანდაცვის სექტორის მზაობის გაუმჯობესებაში ერთობლივად ეხმარებიან.
ევროკავშირისა და ჯანმო-ს მიერ ვაქცინების ხელმისაწვდომობის და ვაქცინაციის პროცესის მხარდაჭერის გარდა, საქართველო იღებს ისეთ დახმარებას, როგორიცაა საჭირო მოწყობილობები, პროგრამებისა თუ აპლიკაციების შექმნა, ვაქცინაციის პროცესში ჩართული პერსონალის ტრენინგი, ვაქცინების ეფექტიანობის მონიტორინგი და საკომუნიკაციო საქმიანობის მხარდაჭერა ვაქცინების მიმართ უნდობლობის აღმოსაფხვრელად.
