დაავადებათა კონტროლის ეროვნული ცენტრის არაგადამდებ დაავადებათა დეპარტამენტის უფროსმა ლელა სტურუამ პარლამენტის ჯანდაცვის კომიტეტს, სადაც „თამბაქოს კონტროლის შესახებ“ საქართველოს კანონში ცვლილებებს განიხილავენ, დაავადებათა კონტროლის ეროვნული ცენტრის დირექტორის ამირან გამყრელიძის წერილი გააცნო.
როგორც წერილში გამყრელიძე აღნიშნავს, ცვლილება, რომელიც თამბაქოს ნაწარმის მიწოდების 15 გრამიან შეფუთვებში დაშვებას გულისხმობს, არასრულწლოვნებისთვის თამბაქოს მეტად ხელმისაწვდომს გახდის. ამირან გამყრელიძის თქმით, ევროკავშირის დირექტივით გათვალისწინებულია, რომ შესახვევი თუთუნის ერთი კოლოფი უნდა შეიცავდეს არანაკლებ 30 გრამ თამბაქოს და „ამ რეკომენდაციიდან გადახვევის საფუძვლიანი დასაბუთება საკანონმდებლო ინიციატივიდან არ ჩანს“.
„გვსურს გათვალისწინებული იქნას, რომ არსებული რეგულირებით შესაბამისი თამბაქოს ნაწარმის მხოლოდ 50 და 100 გრამიანი საფუთავებით, ისევე, როგორც მაგალითად, სიგარეტის შეთხვევაში მხოლოდ 20 ღერიანი შეფუთვით ბაზარზე მიწოდების შეზღუდვა, გამომდინარეობს თამბაქოს კონტროლის კანონმდებლობის ერთ-ერთი მიზნიდან – მიღებულ იქნას ზომები თამბაქოს ნაწარმზე ხელმისაწვდომობის, განსაკუთრებით არასრულწლოვანთათვის ხელმისაწვდომობის შემცირებასთან დაკავშირებით.
ევროკავშირის დირექტივით პირდაპირაა განსაზღვრული, რომ სიგარეტის ერთი კოლოფი უნდა შეიცავდეს მინიმუმ 20 ღერ სიგარეტს. შესახვევი თუთუნის ერთი კოლოფი უნდა შეიცავდეს არანაკლებ 30 გრამ თამბაქოს. აღნიშნულიდან გამომდინარე დაავადებათა კონტროლისა და საზოგადოებრივი ჯანმრთელობის ეროვნული ცენტრი მიიჩნევს, რომ შემოთავაზებული საკანონმდებლო ინიციატივა სრულიად შეუსაბამოა თამბაქოს კონტროლის კანონმდებლობის მიზნებთან და წინააღმდეგობაში მოდის ევროკავშირის სტანდარტებთან. 15 გრამიან საფუთავებში თამბაქოს ნაწარმის მიწოდების დაშვება მას უფრო ხელმისაწვდომს გახდის არასრულწლოვნებისთვის. ამასთან, ნაწარმის წონის შემცირებიდან გამომდინარე ფასის შემცირების გზით მოიზიდავს უფრო მეტ მომხმარებელს და გაზრდის თამბაქოს ინდუსტრიის მოგებას, გააძლიერებს მას, რაც თამბაქოს კონტროლის სახელმწიფო მიზნებთან არ არის შესაბამისი.
მართალია, ევროკავშირის დირექტივას არ აქვს სავალდებულო ძალა და ის მხოლოდ რეკომენდაციული ხასიათისაა, ვინაიდან საქართველო დიდი ხანია თამბაქოს კონტროლის კანონმდებლობის შექმნისა და დახვეწის პროცესში ითვალისწინებს აღნიშნული დირექტივის მოთხოვნებს და ცდილობს, ამ დირექტივით გათვალისწინებული უფრო მაღალი დონის სტანდარტი დაადგინოს, ამ მიდგომიდან გადახვევისთვის, მნიშვნელოვანია, არსებობდეს საფუძვლიანი დასაბუთება, რაც წარმოდგენილი საკანონმდებლო ინიციატივიდან საერთოდ არ ჩანს“,- აღნიშნულია ამირან გამყრელიძის წერილში.
