ქუთაისში, ოპოზიციური პარტიებისა და მათი მხარდამჭერების საპროტესტო აქცია დასრულდა. აქციის მინაწილეები პროპორციულ საარჩევნო სისტემაზე გადასვლას ითხოვდნენ.
ქუთაისში, კიკვიძის სკვერში შეკრებილ ოპოზიციის ლიდერებსა და მათ მხარდამჭერებს, ახლომდებარე ერთ-ერთი შენობის სახურავიდან კვერცხები დაუშინეს. აქციის მონაწილეებმა მოწინააღმდეგეებს ხუმრობით უპასუხეს. კერძოდ, ქუდები გაუწოდეს და მიმართეს, რომ „კვერცხები იქ ჩაეყარათ“.
აქვე ოპოზიციის მხარდამჭერსა და ერთ-ერთ მოქალაქეს შორის შელაპარაკება მოხდა. როგორც კიკვიძის პარკში შეკრებილი მოქალაქეები აცხადებდნენ, ეს ადამიანი ქუთაისის მცხოვრები არ არის და ის პარკში პროვოკაციის მოსაწყობად იყო მისული. ამასთან, დაპირისპირებისას აღნიშნულმა მოქალაქემ „რუსთავი 2“-ის ჟურნალისტისთვის მიკროფონის წართმევა სცადა. მოქალაქე სამართალდამცველებმა ადგილიდან გაიყვანეს.
აქვე უცნობმა პირმა „ახალი საქართველის“ ლიდერის, გიორგი ვაშაძის მიმართულებით ბოთლი ისროლა.
„დღესაც, ხვალაც და ზეგაც იქნება პროვოკაციები, რადგან ამ ე.წ. ხელისუფლებას სხვა არაფერი შეუძლია: არც განვითარება, არც შენება, არც განათლება, არც ჯანდაცვა, არც ბიუჯეტი – არაფერი შეუძლიათ გარდა იმისა, რომ მუდმივად მოუწყონ საქართველოს მოქალაქეებს პროვოკაციები. თვითონ ეს ხელისუფლებაა 2012 წლიდან პროვოკაცია,“ – განაცხადა გრიგოლ ვაშაძემ.
კიკვიძის პარკთან დაწყებული აქცია მსვლელობა რუსთაველის გამზირზე ქუთაისის მერიის მიმართულებით გაგრძელდა. აქციის მონაწილეებს დაკავებული ჰქონდათ გზის სავალი ნაწილი. გაერთიანებული ოპოზიციის მასშტაბურმა აქციამ რუსთაველის გამზირზე “ქართული ოცნების” ოფისთან ტაშით ჩაიარა. მმართველი გუნდის ოფისთან მობილიზებულები იყვნენ “ქართული ოცნების” აქტივისტები და მხარდამჭერები.
„როცა არ უნდა მოხვიდეთ, თითქმის სულ ოფისში ვართ. ყველანარად ვემიჯნებით ძალადობას. დღეს არის ჩვეულებრივი სამუშაო პროცესი, უბრალოდ, გამოვედით, ვაკვირდებოდით რამდენი იქნებოდნენ, დაგვაინტერესა. აქ ქუთაისელი იქნებოდა ალბათ 20-30 ადამიანი, მეტი – არა. დანარჩენი ჰყავთ რეგიონებიდან ჩამოყვანილი. ბაბუაჩემის გასვენებაზე უფრო მეტი ადამიანი იყო შეკრებილი“, – განაცხადა „ქართული ოცნების“ ახალგაზრდული ორგანიზაციის წევრმა.
აქციაზე, რომელმაც ქუთაისის მერიის წინ მშვიდობიანი მსვლელობით გადაინაცვლა, მოქალაქემ ქრიზანთემები მოიტანა და ცოცხებს ყვავილები დაუპირისპირება. მისივე თქმით ეს ყვავილები ქართველი ხალხის გამარჯვების გამოხატულებაა. მერიის წინ მიმდინარე აქციაზე ინციდენტიც მოხდა. უცნობმა პირმა მოძრაობა „შეცვალეს“ წევრებს სიტყვიერი შეურაცხყოფა მიაყენა, რაც ფიზიკურ დაპირისპირებაში გადაიზარდა. სამართალდამცავებმა სიტუაციის განეიტრალება მოახერხეს და უცნობი პირი ტერიტორიას განარიდეს.
ქუთაისში, ოპოზიციური პარტიებისა და მათი მხარდამჭერების საპროტესტო აქცია რამდენიმე საათის წინ დასრულდა. აქციის მინაწილეები პროპორციულ საარჩევნო სისტემაზე გადასვლას ითხოვდნენ.
როგორც ოპოზიციური პარტიების ლიდერებმა სიტყვით გამოსვლისას განაცხადეს, ამ მოთხოვნით აქცია მშვიდობიანი ფორმით ქვეყნის მასშტაბით, სხვადასხვა ქალაქებშიც გაიმართება, ვიდრე მათი მოთხოვნა არ დაკმაყოფილდება.
