პატრიარქის მიერ „ჯორჯიან ეარვეისის“ სახელზე ნაკურთხი და კომპანიისათვის ნაჩუქარი ხატი აბრძანდა ჩვენს ბოინგ 737-800 ბორტზე, – ამის შესახებ „ჯორჯიან ეარვეისის“ დირექტორი რომან ბოკერია Facebook-ის საკუთარ გვერდზე წერს და ვიდეოსაც აქვეყნებს.
https://www.facebook.com/roman.bokeria.7/videos/pcb.1295480397322829/1295472510656951/?type=3&theater
ვიდეოში ნაჩვენებია, რომ თბილისი – ათენი – თბილისის მიმართულებით ავიარეისის შესრულებამდე ბოინგზე პარაკლისიც შესრულდა.
„ხარების ბრწყინვალე დღესასწაულს გილოცავთ, ჩემო დებო და ძმებო! დღეს, 7 აპრილს, ხარება დღეს, სრულიად საქართველოს კათოლიკოს პატრიარქის მიერ „ჯორჯიან ეარვეისის“ სახელზე კურთხეული და კომპანიისათვის ნაჩუქარი ხატი აბრძანდა ჩვენს ბოინგ 737-800 ბორტზე. პატრიარქის ნაჩუქარი ხატი დღეს დილით 9:00 საათზე სპეცრეისით გაფრინდა თბილისი – ათენი – თბილისის მიმართულებით და დაიცავს საქართველოს მოქალაქეების მშვიდობიან დაბრუნებას სამშობლოში. ეს ხატი იქნება ყველა სპეც რეისზე, რომელიც უზრუნველყოფს საქართველოს მოქალაქეების დაბრუნებას სამშობლოში“, – წერს რომან ბოკერია.
მთავრობა უცხოეთიდან საქართველოს მოქალაქეების სამშობლოში ეტაპობრივი დაბრუნების პროცესს განაგრძობს. დღეს შესრულდება რეისი ათენი-თბილისის მიმართულებით, 10 აპრილს ლარნაკა-თბილისი მიმართულებით, 12 აპრილს, თბილისი-ბერნილი-თბილისის მიმართულებით. ეს ის რეისებია, რომელიც უკვე დაანონსებული იყო და რომლებზეც ბილეთების გაყიდვა ორი დღით ადრე დაიწყება.
საგარეო უწყების ინფორმაციით, უცხოეთში მყოფი მოქალაქეების სამშობლოში ეტაპობრივი დაბრუნების მიზნით დაგეგმილია ფრენები ასევე: 14 აპრილი თბილისი-ამსტერდამი-თბილისი, 16 აპრილი – თბილისი-პარიზი-თბილისი, 18 აპრილი – თბილისი-თელავივი-თბილისი, 21 აპრილი – თბილისი-რომი-თბილისი, 24 აპრილი – თბილისი-ბარსელონა-თბილისი, 27 აპრილი – თბილისი-ვარშავა-თბილისი.
ავიარეისებს, სახელმწიფოს ხელშეწყობით, „ჯორჯიან ეარვეისი“ ასრულებს. ამ დროისთვის საქართველოში უკვე 5 000-მდე მოქალაქე დაბრუნდა.
