აღნიშნულის შესახებ, მთავრობამ საკანონმდებლო ცვლილებათა პაკეტი პარლამენტში უკვე წარადგინა.
განმარტებითი ბარათის თანახმად, არსებული კანონმდებლობა გზისპირა ზონებში (გზის ღერძიდან 100 ან/და კანონით გათვალისწინებულ შემთხვევაში, 200 მეტრში) უკანონო მშენებლობებს კრძალავს, თუმცა დარღვევებისთვის კონკრეტულ სანქციებს არ ითვალისწინებს.
შესაბამისად, ცვლილებების მიხედვით, აღნიშნულ დარღვევებზე წესდება ჯარიმები.
ამასთან, იქმნება სპეციალიზებული სახელმწიფო კომპანია, რომელსაც საერთაშორისო და შიდასახელმწიფოებრივი გზების მოვლა-შენახვა დაევალება.
დოკუმენტის მიხედვით, ახალი კომპანიის ჩამოსაყალიბებლად დაახლოებით 63 მილიონი ლარის კაპიტალური ინვესტიცია იქნება საჭირო, ხოლო წლიური საოპერაციო ხარჯი დაახლოებით 30 მილიონ ლარს შეადგენს.
ამასთან, კომპანია 163 თანამშრომელს დაასაქმებს, მათ შორის ტექნიკურ და ადმინისტრაციულ პერსონალს.
დოკუმენტის მიხედვით, სახელმწიფო კომპანია შეიძენს 119 ერთეულ თანამედროვე ტექნიკას, მათ შორის 65 ერთეულ ზამთრის და 54 ერთეულ ზაფხულის მოვლა-შენახვის სპეცტექნიკას. ასევე დაინერგება თანამედროვე მონიტორინგის სისტემები (GPS, GIS, SCADA და სხვა), რაც გზების 24-საათიან კონტროლსა და ოპერატიულ მართვას უზრუნველყოფს.
გარდა ამისა, როგორც პროექტის განმარტებით ბარათშია აღნიშნული, საავტომობილო გზების დეპარტამენტში შეიქმნება ახალი სამსახური, რომელიც სამართალდარღვევების გამოვლენასა და რეაგირებაზე იქნება პასუხისმგებელი. აღნიშნულ სამსახურში 25 თანამშრომლის დასაქმება იგეგმება, ხოლო მათი სახელფასო ფონდი თვეში დაახლოებით 120 000 ლარი იქნება.
რაც შეეხება ფულად სანქციებს, ცვლილებების მიხედვით 500-დან 100 000 ლარამდე განისაზღვრება.
უფრო კონკრეტულად, კანონპროექტით, გზების დეპარტამენტთან შეუთანხმებლად ან შეთანხმებული პირობების დარღვევით, გზისპირა ზონებში ნებისმიერი სამშენებლო საქმიანობის განხორციელებისთვის თავდაპირველად ფიზიკური და იურიდიული პირები გაფრთხილებას მიიღებენ.
ხოლო იმ შემთხვევაში თუ დარღვევა დადგენილ ვადაში არ გამოსწორდება, ფიზიკური პირი 500 ლარით, ხოლო იურიდიული პირი 2 000 ლარით დაჯარიმდება.
განმეორებითი დარღვევის შემთხვევაში კი, ჯარიმა ფიზიკური პირისთვის 1 500 ლარამდე, ხოლო იურიდიული პირისთვის 6 000 ლარამდე გაიზრდება.
ამასთან, კანონპროექტის მიხედვით, თუ დარღვევის შედეგად საავტომობილო გზა ან მისი ინფრასტრუქტურა დაზიანდება, ფიზიკური პირი 1 500 ლარით, იურიდიული პირი კი 50 000 ლარით დაჯარიმდება.
განმეორებით ჩადენილი მსგავსი სამართალდარღვევისთვის სანქცია კიდევ უფრო მკაცრდება და ფიზიკური პირისთვის 3000 ლარს, ხოლო იურიდიული პირისთვის 100 000 ლარს შეადგენს.
რაც შეეხება კანონპროექტის ბიუჯეტზე შესაძლო გავლენას, პროექტის ავტორების შეფასებით, გზისპირა ზონებში დარღვევების გამოვლენის შედეგად ბიუჯეტში წლიურად დაახლოებით 1.2 მილიონი ლარის ჯარიმები შევა, ხოლო უკანონო მშენებლობებისა და ინფრასტრუქტურის დაზიანების პრევენციის გზით სახელმწიფო ყოველწლიურად დაახლოებით 400 000-700 000 ლარს დაზოგავს.
