წყალტუბოს მუნიციპალიტეტში კორონავირუსის გავრცელების საპრევენციო ღონისძიებები მიმდინარეობს, ასევე გრძელდება შეჭირვებული მოსახლეობისთვის პროდუქტების დარიგების პროცესი. აღნიშნულტან დაკავშირებით ინფორმაციას წყალტუბოს მუნიციპალიტეტის პრესსამსახური ავრცელებს.
როგორც მათ ინფორმაციაშია აღნიშნული, მუნიციპალიტეტის მერმა გრიგოლ იოსელიანმა, პარლამენტარებმა ცოტნე ზურაბიანმა და დიმიტრი მხეიძემ შეჭირვებულ ოჯახებს საკვები პროდუქტები გადასცეს.
„წყალტუბოს მუნიციპალიტეტის ბიუჯეტიდან სააღდგომოდ დახმარებას მიიღებენ მრავალშვილიანი ოჯახები 0-დან 65 000-მდე სარეიტინგო ქულით, შეზღუდული შესაძლებლობის მქონე ბავშვები, დიდი სამამულო ომის მონაწილეები, დედ-მამით ობოლი ბავშვები და ას წელს გადაცილებული პირები, სულ -310 ოჯახი, ასევე სააღდგომოდ ა(ა)იპ „წყალტუბოს სათნოების სახლის“ 190 ბენეფიციარი მიიღებს ფულად დახმარებას, თითოეული 100 ლარის ოდენობით”, – განაცხადა მუნიციპალიტეტის მერმა გრიგოლ იოსელიანმა.
წყალტუბოს მუნიციპალიტეტის საგანგებო ბიუჯეტის, საგანგებო მდგომარეობასთან დაკავშირებულ ღონისძიებათა მიზნობრივი პროგრამის ფარგლებში დახმარება უკვე გაეწია მაღალი რისკის ქვეშ მყოფ, 70 წელს გადაცილებულ, მარტოხელა მზრუნველობამოკლებულ 300 ბენეფიციარს, პროდუქტის შესაძენად ჯამში 12 000 ლარი გამოიყო. საბავშვო ბაღების 1800 აღსაზრდელისათვის შეძენილი იქნა კუთვნილი საკვები, თითოეულზე ერთი თვის მარაგის ოდენობით და მოხდა მიწოდება მშობლებისათვის. საერთო გამოყოფილმა თანხამ 43 448 ლარი შეადგინა.
მუნიციპალიტეტის სარეზერვო ფონდიდან წარმოდგენილი დოკუმენტაციის შესაბამისად, სიცოცხლისათვის განსაკუთრებით საშიში დაავადებების მქონე 64 ოჯახს ფულადი დახმარება გაეწია. ჯამში, აღნიშნული მიმართულებით 20 000 ლარი გამოიყო. კერძო კომპანიების კეთილი ნებით ჯამში შეძენილი იქნა 24 470 ლარის საკვები პროდუქტი, რომელიც მუნიციპალიტეტის 605 სოციალურად შეჭირვებულ ოჯახზე გადანაწილდა. აღნიშნული კომპანიებია: შპს “როსტვერკი“, შპს „მიმდემი“, შპს „ორიენტირი“, მარკეტების ქსელი „დეილი“, წყალტუბოს ტექინსპექტირების ჯგუფი, შპს „თბილსერვისჯგუფი“, შპს „სტარტი პლიუსი“, შპს „ვესთ სთარი“, შპს „ლიდერი“, ი/მ „გიორგი კვერნაძე“, სოფელ რიონის მცხოვრები ადგილობრივი მეწარმეები, სოფლების: ხომულის, გუმბრის, ბანოჯის და გვიშტიბის მეფუტკრეები.
აფხაზეთის ავტონომიური რესპუბლიკის მთავრობამ საკვები პროდუქტები და ჰიგიენური საშუალებები გადასცა წყალტუბოში მცხოვრებ 450 დევნილის ოჯახს. ამ ეტაპისთვის, საკვები პროდუქტების სახით დახმარება მიიღო მუნიციპალიტეტში მცხოვრებმა 3406 ოჯახმა.
უახლოს მომავალში წყალტუბოს მუნიციპალიტეტის საგანგებო ბიუჯეტიდან დახმარება გაეწევა მუნიციპალიტეტში მცხოვრებ აფხაზეთიდან იძულებით გადაადგილებულ 70 წელს გადაცილებული პირების და სოციალურად შეჭირვებულ მრავალშვილიან ოჯახებს, მუნიციპალიტეტის სოფლებში სიღარიბის ზღვარს მიღმა მყოფ გაჭირვებულ 300 ოჯახს“, – ნათქვამია წყალტუბოს მუნიციპაიტეტის პრესსამსახურის მიერ გავრცელებულ ინფორმაციაში.
