წყალტუბოში მუშაობა განაახლა თეთრა მღვიმემ, ბუნების უნიკალურმა ძეგლმა, რომელიც გასული საუკუნის ბოლო ათწლეულებიდან იყო მიტოვებული და პრაქტიკულად განადგურებული. მანამდე იგი ფუნქციონირებდა ,როგორც სპელეოთერაპიის უნიკალური ობიექტი და აქ წარმატებით მკურნალობდნენ ბრონქულ ასთმას, ქრონიკულ ბრონქიტს, გულსისხლძარღვთა სისტემის ქრონიკულ დაავადებებს, ჰიპერტონულ დაავადებას და ნევროზებს. მღვიმე ასევე გამოიყენებოდა კოსმონავტების და ავიადისპეჩერების სარეაბილიტაციო-მოსამზადებელ ცენტრად. ბუნების ძეგლი, უნიკალურია იმითაც, რომ მეცნიერულადაა დამტკიცებული 30000 წლის წინ აქ ადამიანის ცხოვრების ფაქტები , რაც ასევე დადასტურებულია არქეოლოგიური გათხრების შედეგად ნაპოვნი 15000-მდე არტეფაქტით ( ადამიანის და ცხოველების ჩონჩხის ნაწილები, კერამიკის ნაკეთობები, , სპილენძის ისრის პირი,შუბები, კვირისტავები და სხვა) , რომლებიც დაცულია საქართველოს ეროვნულ მუზეუმში.
ინვესტორმა კომპანია “თეთრა ჯგუფმა” შეძლო ბუნების ძეგლის სრული რეაბილიტაცია და მღვიმის მიკროკლიმატის შენარჩუნებასთან ერთად აღადგინა და დამატებით შექმნა შესაბამისი ინფრასტრუქტურა , რითაც იგი ხელმისაწვდომი, კომფორტული და საინტერესო გახადა დამსვენებლებისთვის და ვიზიტორებისთვის,მათ შორის სპეციალური საჭიროების მქონე პირთათვის(სსმპ).
არის სხვა სიახლეებიც!
მღვიმეში არსებული მუდმივი ტემპერატურა (13-14 გრადუსი ცელსიუსით ) და ტენიანობა (75-85% ) შესანიშნავი გარემოა ასევე ღვინის დაძველებისათვის. შესაბამისად მღვიმის ერთ-ერთ დარბაზში მოეწყო ღვინის საცავი და გაჩნდა საშუალება, ვიზიტორმა დააგემოვნოს სამი სხვადასხვა ჯიშის იმერული, მაღალი კლასის ღვინო ხემსით, ასევე დაინტერესებულმა პირებმა თავიანთი ღვინოები განათავსონ სპეციალურ საცავებში დასაძველებლად.
ამ ეტაპზე მღვიმეში წარმოდგენილია მეღვინეობის „ჭური ჩინებული“ პრემიუმ კლასის ღვინოები : კრახუნა 2018, ციცქა-ცოლიკოური 2017, ოცხანურის საფერე 2018 და იმერული სადესერტო. „ღვინის გიდებმა ტრენინგი გაიარეს USAID დაფინანსებით, ეკონომიკური უსაფრთხოების პროექტის ფარგლებში ” DMO Kakheti ” და ” DMO Imereti” ის თანამონაწილეობით.
