რუსუდან ლორთქიფანიძის მოულოდნელი გარდაცვალების გამო მელიტონ ბალანჩივაძის სახელობის ცენტრალური სამუსიკო სასწავლებელი სამძიმრის წერილს აქვეყნებს.
“წარმოუდგენელია ქუთაისი მის გარეშე. საბედისწერო შემთხვევა რომ არა, ის კიდევ დიდხანს უთავკაცებდა საქმეს, რომელსაც ათწლეულები ერთგულად ემსახურებოდა. კარგი ხელმძღვანელი და ორგანიზატორი, თაობების აღმზრდელი, საუკეთესო კოლეგა და მეგობარი, მუდამ ღიმილიანი, კეთილმოსურნე, მხურვალე გულშემატკივარი იმ საქმის, რომელსაც მთელი თავისი შეგნებული ცხოვრება და პროფესიული საქმიანობა მიუძღვნა.
ქუთაისის მუსიკალურმა საზოგადოებამ დაკარგა ღირსეული წარმომადგენელი, შესანიშნავი, ყველასთვის საყვარელი პიროვნება, ქალბატონი რუსუდან ლორთქიფანიძე.
ვუთანაგრძნობთ და ვუსამძიმრებთ მის ოჯახს, ახლობლებს, ა. წერეთლის უნივერსიტეტის ჰუმანიტარული ფაკულტეტის საშემსრულებლო მიმართულების სრულ შემადგენლობას, სტუდენტებს და პედაგოგებს.
მადლობა ქალბატონ რუსუდანს გაწეული მრავალწლიანი ღვაწლისთვის და უხვად გაცემული სიყვარულისთვის.
უფალმა მიიბაროს მისი ლამაზი სული და დაუმკვიდროს ნათელი მარადიულ სასუფეველში!
“
რუსუდან ლორთქიფანიძემ დაამთავრა თბილისის ვანო სარაჯიშვილის სახელობის |სახელმწიფო კონსერვატორია, კვალიფილაცია-მუსიკის- მცოდნე, მუსიკალურ-თეორიული დისციპლინების მასწავლებელი. სამუშაო გამოცდილება: სსიპ–აკაკი წერეთლის სახელმწიფო უნივერსიტეტ მოწვეული მასწავლებელი (სოლფეჯიოს სასწავლო კურსი), საჯარო სამართლის იურიდიული პირი ქალაქ ქუთაისის სამუსიკო კოლეჯი – პროფესორი სხვადასხვა წლებში იყო საქალაქო, რესპუბლიკური და საერთაშორისო კონკურსებისა და ფესტივალების ჟიურის თავმჯდომარე / თანათავმჯდომარე / საპატიო თავმჯდომარე.
20 წელზე მეტია აორგანიზებს და ხელმძღვანელობს იმერეთში კლასკური მუსიკის საყმაწვილო ფესტივალს „დელფიადა“. უწევდა კონსულტაციებს და უტარებდა მასტერ-კლასს იმერეთის რეგიონის სამუსიკო დაწესებულებებს. მონაწილეობდა იმერეთის მხარის სამუსიკო სკოლების მასწავლებელთათვის განკუთვნილ სემინარებში.
იყო ღირსების ორდენის კავალერი, ქუთაისის საპატიო მოქალაქე, ამიერკავკასიის ხალხთა აკადემიის წევრობის კანდიდატი, საქართველოს ისტორიულ საგვარეულოთა შთამომავლების, თავად-აზნაურთა და მათ თანამდგომთა საკრებულოს წევრი, ჭიათურის ზ. ანჯაფარიძის სახელობის სამუსიკო სკოლის მხარდამჭერთა საბჭოს წევრი, მეცენატის ბარათი. ქუთაისის მ. ბალანჩვაძის სახელობის ოპერისა და ბალეტის თეატრის მხარდაჭერისთვის.
რუსუდან ლორთქიფანიძე დაარსებიდან ხელმძღვანელობდა ქუთაისის კონსერვატორიას.
