საერთაშორისო წესრიგის საფუძვლები სერიოზული და გრძელვადიან გამოწვევების წინაშე დადგა, რუსეთის პრეზიდენტი ვლადიმერ პუტინი და მისი რეჟიმი კი მკაფიო და რეალურ საფრთხეს წარმოადგენენ.
ამის შესახებ ამერიკის შეერთებული შტატების სახელმწიფო მდივანმა ენტონი ბლინკენმა განაცხადა.
მისი თქმით, უკრაინაში სამი თვის წინ სრულმასშტაბიანი შეჭრით პუტინმა დაარღვია სუვერენიტეტისა და ტერიტორიული მთლიანობის პრინციპები, რომლებიც გამყარებულია გაეროს წესდებით და მოწოდებულია დაიცვას ყველა ქვეყანა დაპყრობის ან იძულებისგან.
„ამიტომ ამდენად ბევრი ქვეყანა გაერთიანდა, რათა წინააღმდეგობა გაუწიოს ამ აგრესიას, რადგან ისინი ამას ხედავენ, როგორც პირდაპირ თავდასხმას საკუთარი მშვიდობისა და უსაფრთხოების საფუძვლებზე“, – თქვა ბლინკენმა.
როგორც სახელმწიფო მდივანმა აღნიშნა, უკრაინა მამაცურად იბრძვის თავისი ხალხისა და საკუთარი დამოუკიდებლობის დასაცავად და ამის გამო ამერიკის შეერთებული შტატებისა და მთელი მსოფლიოს ქვეყნებისგან უპრეცედენტო დახმარებას იღებს.
„და მიუხედავად იმისა, რომ ომი კვლავ გრძელდება, პრეზიდენტმა პუტინმა ვერ მიაღწია ვერც ერთ თავის სტრატეგიულ მიზანს. იმის ნაცვლად, რომ უკრაინის დამოუკიდებლობა გაენადგურებინა, მან ის გააძლიერა. იმის ნაცვლად, რომ ნატო გაეყო, ის გააერთიანა. იმის მაგივრად, რომ რუსეთის ძალა და ძლიერება დაემტკიცებინა, მას ძირს უთხრის და იმის ნაცვლად, რომ დაესუსტებინა საერთაშორისო წესრიგი, ქვეყნები მის დასაცავად გააერთიანა“,- განაცხადა ბლინკენმა.
ამასთან, აშშ-ს სახელმწიფო მდივანმა თქვა, რომ ვაშინგტონი რჩება კონცენტრირებული “საერთაშორისო წესრიგის ყველაზე სერიოზულ გრძელვადიან გამოწვევაზე”, რაც არის ჩინეთი.
„ჩინეთი არის ერთადერთი ქვეყანა, რომელიც მიზნად ისახავს შეცვალოს საერთაშორისო წესრიგი და ამისთვის აქვს სულ უფრო მეტი ეკონომიკური, დიპლომატიური, სამხედრო და ტექნოლოგიური ძალა“, – განაცხადა ბლინკენმა.
სახელმწიფო მდივანმა ასევე აღნიშნა, რომ ვაშინგტონი არ ესწრაფვის კონფლიქტს ან ახალ ცივ ომს, არამედ პირიქით, სურს ორივე მათგანს თავი აარიდოს. ბლინკენის განმარტებით, აშშ არ ცდილობს ჩინეთის როგორც დიდი სახელმწიფოს როლის დაბლოკვა და მისი ეკონომიკის შეჩერება.
