“პოლიტიკურმა პარტიებმა უნდა იფიქრონ იმაზე, რომ ყველა წყენა, წვრილმანი კინკლაობა და მითუმეტეს პირადი ამბიცია, ყველაფერი გვერდზე უნდა გადაიდოს. რა თქმა უნდა, არც არჩევნები იქნება ჩვეულებრივი. ეს არ არის ჩვეულებრივი არჩევნები და არ შეიძლება მოვიქცეთ ჩვეულებრივად. ჩვენ გვჭირდება ერთიანი სია, რომელიც მოიყვანს პროფესიონალებს მთავრობაში და იმ ხალხს, ვინც შეიძლება პოლიტიკაში აქტიურად არ არის, მაგრამ შეუძლია ქვეყნის უკეთესობისკენ წაყვანა. ” ამბობს მიხეილ სააკაშვილი.
მესამე პრეზიდენტი გამოეხმაურა “ოცნების” კონტრაქციასაც, რომელიც 29-შია დაგეგმილია და აღნიშნა, რომ არასწორია შედარება, თითქოს მისი ხელისუფლებაც უწყობდა ხალხს კონტრაქციებს:
“არასდროს ჩვენ არ მოგვიწყვია კონტრაქცია ოპოზიციისთვის. დიახ ვაწყობდით საარჩევნო მიტინგებს, მათ შორის, იყო წარმატებულიც და არცთუ წარმატებული მიტინგებიც, მაგრამ ეს იყო საარჩევნო შეხვედრები, რომელიც ხდება ყველა დემოკრატიულ ქვეყანაში.
2009-ში მრავალი თვე თბილისის გადაკეტილი ჰქონდათ კარვებით. არამხოლოდ ძალა არ გამოგვიყენებია, არამედ მე თვითონ გადავედი პრეზიდენტის სასახლიდან, გადავედი სულ სხვა შენობაში და დავუთმე მთლიანად ცენტრი მომიტინგეებს. ჩვენ მაშინ დავუთმეთ მათ ყველაფერი. რატომ ამას არ იხსენებენ? არ არის მოსახერხებელი?” ამბობს მიხეილ სააკაშვილი.
მესამე პრეზიდენტმა დამამცირებელი უწოდა საჯარო მოხელეებისთვის მათ ძალით ჩართვას სახელისუფლებო აქციებში:
“მაქსიმალურად ყველანი ვემზადოთ ხელისუფლების ცვლილებისთვის, ის არის ერთი ხელის გაწვდენაზე. ხომ ხედავთ როგორ შეიცვალა მსოფლიო სიტუაცია, ხო ხედავთ როგორ უჭირს ამათ პატრონს, ხო ხედავთ, როგორ შემოდგომის ბუზებივით იკბინებიან. მონა და აღლუმში თქვენი ჩართვით და ძალით ჩამოყვანით გამცირებენ თქვენ, თქვენს ოჯახებს და გამცირებენ იმაშიც, რომ მომავალში ეს იქნება დიდი სამარცხვინო აქტი…” ამბობს მიხეილ სააკაშვილი სასამართლო პროცესზე ჩართვისას.
