23 აგვისტოს შატილის გზაზე მომხდარ ავარიას 17 ადამიანი ემსხვერპლა, სამი კი მძიმე მდგომარეობაში საავადმყოფოშია გადაყვანილი. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.
როგორც შევიტყვეთ, შემზარავი ავტოავარიის დროს დაღუპულ 17 ადამიანს შორის არის დედა-შვილი, მაია მამუჩაშვილი და მისი 31 წლის ქალიშვილი, ნუცა ყანადაშვილი.
ლაშა თურმანიძე, ტურისტული კომპანია “ივერ ტურის” წარმომადგენელი:
– ნუცას ახლო არ ვიცნობდი, მეგობრებში მყავდა და გვქონდა მიმოწერა. მეც ვაპირებდი ტურის მოწყობას გუშინ, მაგრამ უამინდობის გამო გადავდე. ვერიდები ხოლმე ასეთ ამინდებში ტურის მოწყობას. ორი დღის წინ ვესაუბრე ნუცას, ხევსურეთის ტურზე უარი ვუთხარი, უამინდობის გამო უნდა გადავდო – მეთქი, მეგონა, არ წავიდოდა, წასულა მაინც.
გუშინ “ფეისბუქზე” ხევსურეთში ყოფნისას დაწერა: “ჩემი სული, სულ აქაა, სულ…” – ძალიან დიდი ტრაგედია მოხდა, ძალიან ვწუხვარ.
“17 ადამიანს შორის ჩემი ერთ-ერთი საყვარელი ტურისტი ნუცა ყანადაშვილი და ჩემი კოლეგა სერგო გორლიუკოვია. რთულია სიტყვების მოძებნა, ძალიან დიდი გულისტკივილია ეს ყველაფერი…” – წერს ტურისტული კომპანია “გაიცანი საქართველოს” ხელმძღვანელი ნიკა ჯმუხაძე.
“დიდი ხანია ვიცნობ ნუცას, ზუსტი ინფორმაცია მთლად მეც არ მაქვს, მაგრამ ჩვენმა საერთო მეგობარმა მითხრა, რომ ნუცა დედასთან ერთად იყო და ორივენი გარდაიცვალნენ. ეს სამწუხარო ამბავი სხვებმაც დამიდასტურეს. ნუცას, დაახლოებით, 4 წელია ვიცნობ და რამდენიმე რეგიონში ვყოფილვართ ერთად. ძალიან კარგი ადამიანი და ჩემთვის საყვარელი ტურისტი იყო. როგორც გავიგე, ხევსურეთის შერეული ჯგუფი იყო, როგორც ზოგადად ხდება ხოლმე. მეორე გარდაცვლილი, გიდი – სერგო გორლიუკოვია, სხვადასხვა ტურებზე გადავიკვეთეთ ბევრჯერ, მასაც ახლოს ვიცნობდი და კარგის მეტი არაფრის თქმა არ შემიძლია. ჯგუფის სხვა წევრებზე არაფერი ვიცი. საშინელი ტრაგედიაა და ვწუხვარ…” – გვითხრა ნიკა ჯმუხაძემ.
“ოჯახის ახლობელმა დედა-შვილის გარდაცვალების თაობაზე ინფორმაცია დაუდასტურა kvirispalitra.ge – ს.
“ნუცა მხატვარი იყო, საოცრად ნიჭიერი და უაღრესად კარგი პიროვნება. მოგზაურობა უყვარდა ძალიან, საოცრად კარგი დედა ჰყავდა, მაია დეიდა, უთბილესი ადამიანი. ერთად წასულან ტურზე და ეს საშინელი ამბავი შევიტყვეთ. შოკირებულები ვართ, ვერ ვლაპარაკობ”. იხილეთ სრულად
