შინაგან საქმეთა სამინისტროს თბილისის პოლიციის დეპარტამენტის თანამშრომლებმა, ჩატარებული საგამოძიებო მოქმედებების შედეგად, კოალიცია „ძლიერი საქართველოს“ ერთ-ერთი ლიდერი – ალექსანდრე ელისაშვილი დააკავეს.
მას ბრალი ედება სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის, რაც გულისხმობს ძალადობის გამოყენებით ჩადენილ დევნას.
დანაშაული 3 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ მიმდინარე წლის 2 დეკემბერს, თბილისში, კოსტავას ქუჩაზე მდებარე ერთ-ერთ აფთიაქთან, ალექსანდრე ელისაშვილი პოლიტიკური პარტია „ქართული ოცნების“ წევრს, 1954 წელს დაბადებულ ა.ბ.- ს თავს დაესხა და ფიზიკური შეურაცხყოფა მიაყენა პარტიული შეხედულების გამო.
ალექსანდრე ელისაშვილი სამართალდამცველებმა ჩატარებული საგამოძიებო მოქმედებების შედეგად, ბრალდებულის სახით დააკავეს.
მომხდარ ფაქტზე გამოძიება სისხლის სამართლის კოდექსის 156-ე მუხლის მეორე ნაწილის „ა“ ქვეპუნქტით მიმდინარეობს.
„საქართველოს აზერბაიჯანელთა ეროვნული კონგრესის“ თავმჯდომარე ალი ბაბაევი აცხადებს, რომ მას კოალიცია „ძლიერი საქართველოს“ ერთ-ერთმა ლიდერმა, ალეკო ელისაშვილმა სიტყვიერი და ფიზიკური შეურაცხყოფა მიაყენა.
როგორც ბაბაევი „ინტერპრენიუსთან“ საუბრისას აღნიშნავს, შემთხვევა , საღამო საათებში, ფილარმონიის მიმდებარე ტერიტორიაზე მდებარე ერთ-ერთ აფთიაქთან მოხდა.
ის ასევე აღნიშნავს, რომ მომხდარის შედეგად კლინიკაში გადაიყვანეს, თუმცა უკვე გამოწერეს.
„დაახლოებით, 18:00 საათზე, ფილარმონიის ტერიტორიაზე, აფთიაქში შევდიოდი წამლის საყიდლად. ამ დროს ჩემს უკან ბევრი ხალხი იყო. აქციაზე მიდიოდნენ. მესმოდა, რომ ზურგს უკან მლანძღავდნენ. ყველანაირ ბინძურ სიტყვებს ამბობდნენ ჩემი და ჩემი გუნდის წინააღმდეგ. ამბობდნენ, რომ მე რუსეთის მონა ვარ, მაგინებდნენ. შევტრიალდი და დავინახე ალექსანდრე ელისაშვილი. ვიფიქრე, ხომ არ გააფრინა-მეთქი, „რა დღეში ხარ ბიჭო“-თქო. მითხრა, შენ გეუბნები, შენი დედაო… დავიწიეთ-გამოვიწიეთ და უცბად დამარტყა. შემდეგ სასწრაფო გამოიძახეს და საავადმყოფოში ვიყავი. დღეს გამომწერეს,“ – განაცხადა ბაბაევმა.
