ქუთაისში მიმდინარე საპროტესტო აქციაზე სიტყვიერი და ფიზიკური დაპირისპირება პროტესტის მონაწილეებსა და „ქართული ოცნების“ მხარდამჭერებს შორის მოხდა. მოქალაქეთა ნაწილმა აქციების მიმდინარე გააპროტესტა, მათი თქმით საკმარისია ქვეყანაში არეულობა და აქციის მონაწილეებს 9 წლიანი მმართველობა შეახსენა.
“ქუთაისი თავისუფლებისთვის ” აქცია მესხიშვილის თეატრის წინ 18:00 საათზე დაიწყო და მსვლელობით მერიასთან გაგრძელდა.
ბიძინა ივანიშვილს შეუძლია სტაფილოს წვენი დალიოს, რადგან მალე დავასრულებთ, – განაცხადეს ქუთაისში აქციის მონაწილეებმა, რომელთაც მერიის წინ პერფორმანსი გამართეს. მათ სტაფილოებით „ბიძინა“ დაწერეს, რომლებზედაც იმ დეპუტატების სახელები იყო დატანილი, რომელთაც პროპორციული საარჩევნო სისტემის კანონპროექტი ჩააგდეს. მოგვიანებით აქციის მონაწილეებმა სტაფილოები ნაგვის ურნაში ჩაყარეს.
პროტესტანტებმა ასევე მერიის შენობის მოაჯირს ბოქლომი დაადეს. როგორც აქციაზე განაცხადეს ქართველი ხალხი ხელისუფლების მიერ დადგმულ სპექტაკლში მონაწილეობას არ მიიღებს. პროტესტანტები მოითხოვენ ჩატარდეს რიგგარეშე არჩევნები პროპორციული სისტემით.
ქუთაისში აქციები მეორე დღეა იმართება. სტუდენტების მიერ დაანონსებულ აქციას პოლიტიკოსებიც უერთებიან. როგორც აქციის მონაწილეები აცხადებენ საპროტესტო აქციებს პერმანენტული ხასიათი ექნება.
