უკრაინაში კიდევ ერთი ქართველი მებრძოლის გივი ავალიანის მკვლელობაზე, რომლის შესახებაც “მეგა ტვ” რამდენიმე დღის წინ წერდა, ახალი დეტალები ხდება ცნობილი.
როგორც ცნობილია თავდაპირველად გავრცელებულ ინფორმაცია, რომ გივი გნოლიძე რუს ოკუპანტებთან ბრძოლის დროს დაიღუპა, რასაც მებრძოლის ოჯახის წევრები კატეგორიულად უარყოფენ და აცხადებენ, რომ გივი გნოლიძე ერთ-ერთი დაჯგუფების მეთაურმა, გოჩა ხორავამ მოკლა, რომელიც 12 შეიარაღებულ პირთან ერთად თავს დაესხა მძინარე გივისა და მის მეგობრებს, რომლებსაც ცეცხლი გაუხსნა.
“ერთ ბატალიონში მსახურობდნენ, გოჩა იყო ჩემი ძმის მეთაური. გოჩა ხორავას საქციელები არ მოეწონათ მებრძოლ ბიჭებს, დასხდნენ სალაპარაკოდ რომ უნდა გაყოფილიყვნენ. ასეთი სიტუაცია მოხდა რომ გაიყვნენ, მერე არ ვიცი რამდენ ხანში, გაიგო (გოჩა ხორავამ) ადგილსამყოფელი ბიჭების, მოსული იყვნენ ფრონტიდან, ღამე დაადგა 12 კაცთან ერთად, უკრაინელებთან ერთად, ჩემი ძმა თავის 5 მეგობართან ერთად იყო სახლში. ცხედარი გადამალა, წაიღო იმის მიზნით, რომ ცხელ წერტილში თუ წინა ხაზზე დაეგდო და გაესაღებინა ისე, რომ ეს ბიჭი მოკვდა რუსებთან ბრძოლაში, ეს იყო მაგისი იდეა. ეგ არ არის მაგისი პირველი ფაქტი, მაგას ეგ სხვა დანარჩენ ბიჭებზეც აქვს გაკეთებული. ერთადერთი კონტაქტი მაქვს მებრძოლებთან. როგორც ვიცი უკრაინის უშიშროებაც და პოლიციაც ჩარეულია და გამოძიება დაწყებულია, თუმცა მე არავინ დამკავშირებია ” – აცხადებს გივი გნოლიძის ძმა, დიმა გნოლიძე.
როგორც დიმა გნოლიძე ამბობს მისი ძმის ცხედარი ამ დრომდე არაა ნაპოვნი.
“ოდიშინიუსის” ინფორმაციით დაკავებულია მკვლელობაში ბრალდებული, ხოლო თავდასხმაში მონაწილე სხვა პირების გამოვლენის მიზნით, მიმდინარეობს საგამოძიებო მოქმედებები, რომელთა შესახებ წინასწარ ინფორმაციის გავრცელება, შეზღუდულია.
“მკვლელი უკვე ნაპოვნი და დაკავებულია, ის კანონის მთელი სიმკაცრით დაისჯება. ამას გარდა, მიმდინარეობს ამ საზარელ დანაშაულში მონაწილე სხვა პირების გამოვლენაც. სწორედ ასეთი არაკაცები გვიტეხავენ სახელს იმ მებრძოლებს, რომლებიც აქ ჩვენი სამშობლოს მტრის წინააღმდეგ ვიბრძვით და ჩვენს სიცოცხლეს სასწორზე ვდებთ ამ ბრძოლაში.
“ამ 10 წლის განმავლობაში აქ სახელი შევქმენით, ძმაო, ქართველი მებრძოლის სახელი შევქმენით და ახლა იცით, რა დღეში ვართ? აი, ქართველი რომ ვარ და შერცხვენილი ვარ… ერთი ან ორი ეგეთი ნაძირალა გამოგვერევა და ყველაფერი რომ თავდაყირა დგება, არადა, ამ სახელის შექმნას შევალიეთ ჩვენი თავდადება…” – უთხრა “ოდიშინიუსს” უკრაინაში მყოფმა ერთ-ერთმა ქართველმა, რომელიც იქ 2014 წლიდან იბრძვის და არაერთი ოფიციალური ჯილდო აქვს მიღებული.
