ცნობილი ქართველი გამომგონებლის გრიგოლ კობახიძის – იგივე ჯორჯ კობის მიერ სოფლისთვის შეძენილი მაღაზიის ნაგებობაში შესაძლოა სახლ-მუზეუმი მოეწყოს.
ამის შესახებ ამბროლაურის მხარის რწმუნებულმა არჩილ ჯაფარიძემ და ამბროლაურის მუნიციპალიტეტის მერმა ზვიად მხეიძემ, სოფელ თხმორში ვიზიტისას ისაუბრეს.
გრიგოლ კობახიძის მშობლიური სახლი რაჭაში, თხმორში მდებარეობს. აღნიშნულ ადგილზე, რეგიონული და ადგილობრივი ხელისუფლების ინიციატივით, დაგეგმილია სახლ-მუზეუმის მოწყობა, რომელიც ტურისტულად ერთ-ერთი მიმზიდველი ადგილი გახდება.
შეგახსენებთ, რომ ჯორჯ კობის ფსევდონიმით ცნობილი რაჭველი გამომგონებელი, იმ პიროვნებათა კატეგორიას მიეკუთვნება, რომლებმაც სახელი მსოფლიო მასშტაბით მოიხვეჭეს და საკუთარი გამოგონებები კომერციულად მომგებიანი გახადეს.
როგორც ამბროლაურის მუნიცპალიტეტის მერიიდან იუწყებიან 30 ივლისს, მხარის რწმუნებული არჩილ ჯაფარიძე და ამბროლაურის მუნიციპალიტეტის მერი ზვიად მხეიძე, სოფ. თხმორში, სოფლის მხარდაჭერის პროგრამის ფარგლებში მიმდინარე ე.წ. ,,თავშეყრის ადგილის“ სარეაბილიტაციო სამუშაოებს გაეცნენ.
“პროექტის დათვალიერებისას გამოიკვეთა მნიშვნელოვანი ხარვეზები, რომლებიც ხელმძღვანელთა თვალსაზრისით სასწრაფო რეაგირებას საჭიროებს.
შესაბამის სამსახურებს აღნიშნული საკითხის დეტალური შესწავლა და ხარვეზების უმოკლეს ვადაში აღმოფხვრა დაევალათ.
შეგახსენებთ, რომ ,,სოფლის მხარდაჭერის პროგრამის” ფარგლებში განსახორციელებელი პროექტები უშუალოდ მოსახლეობის გადაწყვეტილებით, დასახლებებში გამართულ საერთო კრებებზე შეირჩა და ამ მიმართულებით მუნიციპალიტეტში 792 000 ლარი იხარჯება.” – აცხადებენ ამბროლაურის მუნიციპალიტეტში.
