პარტია „თავისუფალი საქართველოს“ განცხადებით, უზენაესი სასამართლოს მოსამართლეობის კანდიდატთა 20-კაციან სიაში 5 კრიმინალი მოსამართლეა. ამის შესახებ პარტია „თავისუფალი საქართველოდან“ იუწყებიან.
ამრიგად, პარტია იუსტიციის საბჭოს მიერ გამოქვეყნებულ უზენაესი სასამართლოს მოსამართლეობის კანდიდატთა 20-კაციან საბოლოო სიას ეხმაურება, რომელიც პარლამენტისთვის არის წარდგენილი.
მათივე ინფორმაციით, საზოგადოებისათვის კარგად არის ცნობილი, რა პერიპეტიები წინ უძღოდა მთელ ამ პროცესს და პრინციპში, სწორედ სასამართლო სისტემის გამო დაიწყო ხელისუფლების მიმართ ის სკანდალი და უნდობლობა, რაც საბოლოო ჯამში, 20 ივნისის მოვლენებით დასრულდა. ამიტომ ხელისუფლებამ ახლა მაინც უნდა გაითვალისწინოს რჩევა, რომელსაც შვიდი წელია, მას „თავისუფალი საქართველო“ აძლევს, რასაც ისინი ამ დრომდე არ ითვალისწინებენ.
„პირველ რიგში, მივესალმებით იმას, რომ ხელისუფლებამ თუნდაც ნაწილობრივ მაინც გაითვალისწინა საზოგადოებრივი აზრი, ხალხის პროტესტი და რამდენიმე ოდიოზური მოსამართლე, მაგალითად, მიხეილ ჩინჩალაძე და დიმიტრი გვრიტიშვილი, ამ სიაში არ არიან. რეკომენდაციას ვაძლევთ ხელისუფლებას – პირველი: ამ მოწვევის პარლამენტი, რომლის ლეგიტიმაცია კითხვის ნიშნის ქვეშ დგას, ნუ შეავსებს უზენაეს სასამართლოს შემადგენლობას სრულად, არამედ დანიშნოს ოთხი-ხუთი მოსამართლე, რომელიც უზენაესი სასამართლოს ფუნქციონირებისათვის კრიტიკულად აუცილებელია. ხოლო მოსამართლეთა დანარჩენი რაოდენობა, 2020 წელს არჩეულმა საქართველოს პარლამენტმა დანიშნოს.
მეორე – უზენაეს სასამართლოში, 20-კაციანი სიიდან, კატეგორიულად არ უნდა დაინიშნონ შემდეგი პირები: იუსტიციის საბჭოს მდივანი გიორგი მიქაუტაძე, რომელიც ზურაბ ადეიშვილის სისტემის ერთ-ერთი საყრდენი მოსამართლე იყო და 2012 წლის ცნობილი საარჩევნო კამპანიის დროს, პირდაპირ იყო პასუხისმგებელი პოლიტიკურად განსხვავებულად მოაზროვნე ადამიანების დაჯარიმებაზე, რასაც ის უტიფრად აკეთებდა და იმის დემონსტრირებას ახდენდა, რომ პირდადად ზურაბ ადეიშვილის სრული და უპირობო მხრადაჭერა ჰქონდა; არ უნდა დაინიშნონ, აგრეთვე, მერაბ გაბინაშვილი და შოთა გეწაძე, რომლებიც იუსტიციის საბჭოს ბოლო მოწვევის წევრები არიან და რომლებიც მურუსიძე-ჩინაჩალაძის ცნობილი სკანდალის დროს, სერგო მეთოფიშვილთან ერთად იუსტიციის საბჭოს იმ უტიფარი დამოკიდებულების სპიკერები და სახეები იყვნენ, რამაც ჩვენი საზოგადოების სრული უნდობლობა გამოიწვია.
აგრეთვე, არ უნდა დაინიშნონ შალვა თადუმაძე და მამუკა ვასაძე, რომლებიც პროკურატურის იმ მანკიერი სისტემის წარმომადგენლები არიან, რომელმა სისტემამაც ჩვენ საზოგადოებაში სრული უნდობლობა არაერთხელ გამოიწვია. ისინი პასუხისმგებლები არიან იმ ათეულობით გამოუძიებელ რეზონანსულ საქმეებზე, რაც ჩვენს საზოგადოებასა და ხელისუფლებას შორის გაჩენილი უფსკრულის ერთ-ერთი მთავარი მიზეზი გახდა.
„თავისუფალი საქართველო“ გამოთქვამს მზადყოფნას, ზემოთაღნიშნულ საკითხთან დაკავშირებით, მონაწილეობა მიიღოს როგორც პარლამენტის იურიდიული კომიტეტის საჯარო სხდომებში, აგრეთვე, ყველა სხვა საჭირო ფორმატში, რათა მაქსიმალურად იქნას თავიდან აცილებული ზემოთაღნიშნული სიის ამ ფორმით დამტკიცება. საქართველოს ხელისუფლებას აქვე შევახსენებთ, რომ ამ სიის ამ ფორმით დამტკიცება, ყველაზე მეტად შედის იმ ექსტრემისტული ძალების ინტერესებში, რომლებიც აუცილებლად გამოიყენებენ ხელისუფლების ამ შეცდომას, რათა ქვეყანას მაქსიმალურად „ცხელი“ შემოდგომა ჰქონდეს“, – ნათქვამია პარტიის განცხადებაში.
