“ახალგაზრდა იურისტთა ასოციაციის“ ინფორმაციით, 14:00 საათისთვის, კენჭისყრის პროცედურები ცალკეულ უბნებზე მნიშვნელოვანი დარღვევებით მიმდინარეობს.
ორგანიზაციის ცნობით, ძირითადად დარღვევები კენჭისყრის ფარულობას, ამომრჩევლის ნების სავარაუდო კონტროლს, დამკვირვებლის მიერ უფლებამოსილების განხორციელების ხელშეშლას ეხება.
საიამ 10:00-დან 14:00 საათამდე პერიოდში შემდეგი სახის დარღვევები დააფიქსირა: – დამკვირვებლის უფლებამოსილების განხორციელების ხელშეშლა: – თელავის #5 უბანზე საიას დამკვირვებელი ყოფნისას ტელეფონით აფიქსირებდა დარღვევის ფაქტს, კომისიის წევრებმა წაართვეს დამკვირვებელს მობილური, წაუშალეს ფოტო და გამოაძევეს უბნიდან; – მარნეულის #5 უბანზე საიას დამკვირვებელს ფიზიკური შეურაცხყოფა მიაყენა სხვა დამკვირვებელმა, რომელიც არის ორგანიზაციის “ადვოკატთა და იურისტთა საერთაშორისო საზოგადოება” დამკვირვებელი. საიამ საჩივარი დაწერა და ამ დამკვირვებლის მიმართ სამართალდარღვევის ოქმის შედგენა მოითხოვა.
ამომრჩევლის ნების სავარაუდო კონტროლი: საგარეჯოში #42 უბანზე, სოფელი იორმუღანლოში, საიას დამკვირვებელმა ხმის მიცემის ფარულობის დარღვევის შემთხვევა გადაიღო. უბანზე იმყოფება ახალგაზრდა მამაკაცი, რომელიც ასაკოვან ამომრჩევლებთან ერთად შედის კაბინაში და აძლევს ხმას. ამას იმით ხსნიან, რომ ამ ადამიანებმა ქართული ენა არ იციან. კანონმდებლობით, ამომრჩევლებს ურთიერთდახმარება შეუძლიათ, მაგრამ ამ შემთხვევის პრობლემურობა მის სისტემურობაში ვლინდება.
– წინა წლების მსგავსად, გრძელდება ამომრჩევლის ნების კონტროლის ტენდენცია. უბნების პერიმეტრზე სხვადასხვა პირის მობილიზაცია შეიმჩნევა, რაც თვალთვალის განცდას ტოვებს და ამომრჩევლის ქცევის შეცვლის საფრთხეს ქმნის. საიას შეფასებით, ეს კანონდარღვევა არ არის, მაგრამ უარყოფითი ტენდენციაა.
საზღვარგარეთის უბნებზე კენჭისყრის დღეს გამოვლენილი დარღვევები (ამ დროისთვის კენჭისყრის პროცედურები დაწყებულია შემდეგ უბნებში: ბარსელონა, ოსლო, რომი, ფრანკფურტი, ბერლინი, პარიზი, ბრიუსელი, ლონდონი) – დაწერილია ერთი საჩივარი ცესკოში რომის საარჩევნო უბანზე არსებული დარღვევების შესახებ. ამომრჩევლებს არ უმოწმდებათ მარკირება, ამასთან, საიას დამკვირვებელს უარი უთხრეს საჩივრის რეგისტრაციაზე; – ბარსელონაში კენჭისყრის შენობა 08:05 წუთზე გაიხსნა. როგორც საიას დამკვირვებლებს განუმარტეს, კომისიის წევრები იყვნენ უბანზე, თუმცა იგი ჩაკეტილი იყო. შესაბამისად, დამკვირვებელმა ვერ შეასრულა თავისი უფლებამოსილება. დაგვიანებით გაიხსნა საარჩევნო უბანი პარიზშიც (08:09).
– კომისიის წევრები არ არიან ინფორმირებულნი, ხშირია ტექნიკური ხარვეზები, კომისიის წევრები მითითების შემდგომ, ძირითადად, მათ ასწორებენ. არის ორგანიზაციული პრობლემებიც, მათ შორის კომისიის წევრები აგვიანებენ და პრობლემებია ინვენტართან დაკავშირებით. კოვიდ-19-ის პანდემიის წინააღმდეგ გასატარებელ ღონისძიებებთან დაკავშირებული დარღვევები: ზესტაფონის #14 უბანზე რეგისტრატორები არ ახსნევინებენ პირბადეს ამომრჩევლებს და არ ამოწმებენ სამაგიდე სიაში არსებულ ფოტოსურათს. ამასთან, რეგისტრატორებს შესაბამისი ხელთათმანები არ ეკეთათ. საიას დამკვირვებლის შენიშვნის შემდეგ დარღვევა აღმოიფხვრა.
