ქუთაისის საფეხბურთო კლუბ „ტორპედოს“ ძირითადმა ფეხბურთელებმა გადაწყვეტილება არ შეცვალეს.
გუნდი კვლავ უარს ამბობს 19 ოქტომბერს “საბურთალოს”-თან დაგეგმილ მატში მონაწილეობაზე:
“გამომდინარე იქიდან, რომ მთავარ გუნდს ვარჯიში არ განუახლებია, სამწვრთნელო შტაბი იძულებულია მოახლოებულ მატჩში/მატჩებში მოედანზე ასაკობრივი გუნდის ფეხბურთელები გამოიყვანოს.
რეგლამენტის თანახმად, კლუბს მატჩის განაცხადში მეორე გუნდიდან მხოლოდ 5 ფეხბურთელის შეყვანა შეუძლია. შესაბამისად, “საბურთალოსთან” მატჩისთვის 17 და 19-წლამდე ასაკობრივი გუნდის ფეხბურთელებიც ემზადებიან.” – აცხადებენ “ტორპედო”-ში.
“ტორპედო” წყალტუბოში კრისტალბეთ ეროვნული ლიგის XXXI ტურის ფარგლებში “საბურთალოს” უმასპინძლებს.
“ტორპედოს” ფეხბურთელებმა ვარჯიშის შეწყვეტის შესახებ განცხადება 9 ოქტომბერს გააკეთეს. გუნდმა კლუბში შექმნილი უმძიმესი ფინანსური კრიზისის გამო, მატჩების ჩატარებაზე უარი განაცხადა.
“ტორპედოში“ რამდენიმე თვეა ფინანსური კრიზისია. ორი წლის შემდეგ კლუბი კვლავ ინვესტორის გარეშე დარჩა.
