აშშ-ის პრეზიდენტ დონალდ ტრამპმა ღაზას სამშვიდობო საბჭოში გასაწევრიანებლად, თითქმის, ხუთი ათეული მსოფლიო ლიდერი იმ იმედით მიიწვია, რომ ანკლავში ხანგრძლივი მშვიდობისა და რეკონსტრუქციისთვის თავის გეგმას განახორციელებს.
ამის შესახებ Bloomberg წერს და ქვეყნების სრულ სიას აქვეყნებს.
რამდენიმე ქვეყანამ დაადასტურა მონაწილეობა, ხოლო საფრანგეთმა უარი თქვა. ახლახან აშშ-ის პრეზიდენტისგან მიწვევა აზერბაიჯანმაც მიიღო. ქვეყნის საგარეო საქმეთა სამინისტროს განცხადებით, ბაქო მიწვევას დათანხმდა. საქართველოს სამეზობლოდან მიწვევა სომხეთმაც მიიღო, რაც პრემიერ-მინისტრ ნიკოლ ფაშინიანის პრესსამსამსახურმა სოციალურ ქსელში გაავრცელა.
Bloomberg-ის სია საკითხთან დაკავშირებული ანონიმური წყაროებიდან მიღებულ ინფორმაციასა და სოციალურ მედიაში გამოქვეყნებულ პოსტებს ეფუძნება. ყველა ქვეყანას მიწვევა არ დაუდასტურებია, ამდენად, ეს სია ამომწურავი არ არის.
ქვეყნების გარდა, სიაში, ასევე, ევროკომისია შედის, ხოლო ჩამონათვალში, ძირითადად, ევროპული ქვეყნების, კერძოდ, ალბანეთის, ავსტრიის, კვიპროსის, ფინეთის, საფრანგეთის, გერმანიის, საბერძნეთის, უნგრეთის, ირლანდიის, იტალიის, ნიდერლანდების, ნორვეგიის, პოლონეთის, პორტუგალიის, რუმინეთის, სლოვენიის, ესპანეთის, შვედეთის, შვეიცარიისა და გაერთიანებული სამეფოს ლიდერები არიან.
ამასთან, უკრაინის პრეზიდენტ ვოლოდიმირ ზელენსკიმ დაადასტურა, რომ უკრაინამ, ასევე, მიიღო მიწვევა აშშ-ის პრეზიდენტისგან, თუმცა მიწვევა რუსეთს და ბელარუსსაც გაეგზავნა.
ტრამპმა მშვიდობის საბჭოში ლათინური ამერიკის ქვეყნები, არგენტინა, ბრაზილია და პარაგვაიც მიიწვია. სიაში, ასევე, ცენტრალური აზიის ორი სახელმწიფო, ყაზახეთი და უზბეკეთია.
ამის გარდა, ჩამონათვალში არიან: ავსტრალია, ბაჰრეინი, კანადა, ჩინეთი, ეგვიპტე, ინდოეთი, ინდონეზია, ისრაელი, იაპონია, იორდანია, მაროკო, ახალი ზელანდია, ომანი, პაკისტანი, კატარი, საუდის არაბეთი, სინგაპური, სამხრეთ კორეა, ტაილანდი, თურქეთი, არაბთა გაერთიანებული საემიროები და ვიეტნამი.
დონალდ ტრამპს სურს, რომ მშვიდობის საბჭოზე ხელმოწერის ცერემონია დავოსში 22 იანვარს გაიმართოს.
ცნობისთვის: 17 იანვარს, თეთრმა სახლმა მშვიდობის საბჭოს წევრების ნაწილი დაასახელა. მათ შორის აშშ-ის სახელმწიფო მდივანი, მარკო რუბიო, ტრამპის სპეციალური წარმომადგენელი სტივ უიტკოფი, ბრიტანეთის ყოფილი პრემიერ-მინისტრი, ტონი ბლერი და ტრამპის სიძე, ბიზნესმენი, ჯარედ კუშნერი არინა. თეთრი სახლის მიერ ოქტომბერში წარდგენილი გეგმის მიხედვით, საბჭოს თავმჯდომარე თავად ტრამპია. 18 იანვარს გავრცელდა ინფორმაცია, რომ ტრამპის ადმინისტრაციას, მინიმუმ, 1 მლრდ დოლარს მოითხოვს იმ ქვეყნებისგან, რომლებიც მის მშვიდობის საბჭოში მუდმივ ადგილს დაიკავებენ.
bpn.ge
