უკრაინის ქალაქებში კვლავ განგაშის სიგნალი ისმის – ღამით სარაკეტო იერიშები იყო კიევზე, ხარკოვზე და ხერსონზე. ჭურვები მოხვდა სკოლებს, მაღაზიებსა და ეკლესიას.
ხარკოვში დაბომბვების დროს დაიღუპა ეუთოს სპეციალური მონიტორინგის მისიის წევრი. მსხვერპლი მოჰყვა საცხოვრებელ კორპუსზე საჰაერო დარტყმას ქალაქ იზიუმში. ბოლო მონაცემებით, დაღუპულია 8 ადამიანი, მათ შორის 2 ბავშვი.
უკრაინული დაზვერვა არ გამორიცხავს, რომ პუტინმა ხვალ მთელი ქვეყნის მასშტაბით საომარი მდგომარეობა და საყოველთაო მობილიზაცია გამოაცხადოს.
რუსული და უკრაინული მხარეები ერთმანეთთან შეხვედრისთვის ემზადებიან, თუმცა მოულოდნელად შეხვედრის ადგილი შეიცვალა. ამასთან დაკავშირებით ინფორმაციას რადას დეპუტატი და უკრაინის დელეგაციის წარმომადგენელი დავით არახამია ავრცელებს.
არსებული ინფორმაციით მოსკოვის დელეგაციის წარმომადგენლები უკვე ბელარუსის ტერიტორიაზე იმყოფებიან, თუმცა ამ დრომდე უცნობია როდის განახლდება სამშვიდობო მოლაპარაკებები.
სანამ მოლაპარაკებები დაიწყება, უკრაინა ისევ იბომბება, დაიბომბა ხარკოვის სულ მცირე სამი სკოლა, ეკლესია და კორპუსები. ერთ-ერთი კორპუსის დაბომბვას ემსხვერპლა მამა ერთი დღის დაბადებულ შვილთან ერთად.
„ჩვენმა დივიზიებმა გაანეიტრალეს დესანტი, რომელიც ცდილობდა თავდასახმას ქალაქ ნიკოლაევთან. უკრაინაში რუსეთის შეჭრის დაწყებიდან მოწინააღმდეგემ 180-ზე მეტი რაკეტა გაუშვა.
სამხედრო ობიექტების გარდა, მძიმედ დაზიანდა სამოქალაქო ინფრასტრუქტურა და საცხოვრებელი ფართები. რუსული საოკუპაციო ძალები არღვევენ საერთაშორისო ჰუმანიტარული სამართლის ნორმებს ადგილობრივი მოსახლეობის, მათ შორის ბავშვების ძარცვითა და მკვლელობით. საოკუპაციო ჯარის მორალი უკიდურესად დაბალია.
მიმდინარე დღის განმავლობაში ოცდაათამდე მოიერიშე თვითმფრინავმა დაარღვია უკრაინის საჰაერო სივრცე, ძირითადად ბელორუსის რესპუბლიკიდან და დაბომბა მშვიდობიანი მოსახლეობა.მტერი დემორალიზებულია , იღუპება ჯარისკაცები და ზარალს განიცდის მათი სამხედრო ტექნიკაც“, – აცხადებს უკრაინის შეიარაღებული ძალების წარმომადგენელი.
სამშვიდობო მოლაპარაკებების პირველი რაუნდი 28 თებერვალს გაიმართა. მაშინ მხარეები ერთადერთ საკითხზე შეთანხმდნენ, რომ ისინი მოლაპარაკების მაგიდას კიდევ ერთხელ მიუსხდებოდნენ.