ამერიკელების კოვიდ 19-ის საწინააღმდეგო ვაქცინაცია, სავარაუდოდ, 11-12 დეკემბერს დაიწყება, – მედიის ინფორმაციით, ამის შესახებ აშშ-ის ვაქცინების პროგრამის ხელმძღვანელმა მონსეფ სლაუიმ განაცხადა.
“ჩვენ ვგეგმავთ, რომ ვაქცინის იმუნიზაციის ადგილებზე გადატანა დამტკიცებიდან 24 საათის განმავლობაში შევძლოთ. ვფიქრობ, ამისთვის ერთი ან ორი დღე დაგვჭირდება, ასე რომ, ეს პროცესი 11 ან 12 დეკემბერს დაიწყება“, – აღნიშნა მონსეფ სლაუიმ CNN- სთან ინტერვიუში.
ამერიკულმა ფარმაცევტულმა კომპანიამ Pfizer– მა და მისმა პარტნიორმა BioNTech–მა კოვიდ 19-ის ვაქცინის გადაუდებელი ავტორიზაციის მოთხოვნის შესახებ განაცხადი პარასკევს შეიტანეს. აშშ-ის სურსათისა და წამლების ადმინისტრაციის (FDA) ვაქცინების საკონსულტაციო კომიტეტი ვაქცინის ნებართვის საკითხის განსახილველად 10 დეკემბერს შეიკრიბება.
ესპანეთში კორონავირუსის საწინააღმდეგო ვაქცინაცია იანვარში დაიწყება და უფასო იქნება. ამ ინფორმაციას ესპანური მედი ავრცელებს.
მათი თქმით, ესპანეთის ხელისუფლებამ ვაქცინის შესაძენად მილიარდი ევრო უკვე გამოყო და 2021 წლის დასაწყისში ისინი კომპანია Pfizer-ის ვაქცინის 20 მილიონ დოზას შეიძენენ. ამასთან, მოლაპარაკებები მიმდინარეობს ესპანეთსა და AstraZeneca-ს შორის კანდიდატი ვაქცინის 31 მილიონი დოზის შესყიდვაზე.
ესპანეთის პრემიერ-მინისტრის, პედრო სანჩესის თქმით, თავდაპირველად ვაქცინაცია იმ პირებს ჩაუტარდებათ, რომლებიც მოწყვლად ჯგუფებს მიეკუთვნებიან, შემდეგ კი მასობრივი ვაქცინაცია დაიწყება. პრემიერი იმედოვნებს, რომ 6 თვეში ესპანეთის მოსახლეობის ძირითადი ნაწილის ვაქცინაცია განხორციელდება.
კორონავირუსის შემთხვევების რაოდენობით ესპანეთი საფრანგეთის შემდეგ მე-2 ადგილზეა ევროპაში. ქვეყანაში ვირუსის 1.5 მილიონზე მეტი შემთხვევა ფიქსირდება, ვირუსს 42 600 ადამიანი ემსხვერპლა.
შეგახსენებთ, ვაქცინამ, რომელიც ორ დოზას საჭიროებს, 95% ეფექტურობა აჩვენა. Pfizer იმედოვნებს, რომ წლის ბოლომდე 50 მილიონამდე დოზის წარმოება იქნება შესაძლებელი.
თურქეთში კორონავირუსის საწინააღმდეგო ვაქცინა უფასო იქნება, – თურქული მედიის ინფორმაციით, ამის შესახებ ქვეყნის ჯანდაცვის მინისტრმა ფაჰრეთინ კოჯამ განაცხადა.
ამასთან, ჯანდაცვის მინისტრმა რამდენიმე დღის წინ აღნიშნა, რომ თურქეთი ჩინური კომპანია Sinovac Biotech-ის მიერ შექმნილი კანდიდატი ვაქცინის 20 მილიონი დოზის შესაძენად უახლოეს დღეებში კონტრაქტის გაფორმებას გეგმავდა.
„დეკემბერში მინიმუმ 10 მილიონი დოზა ჩინური ვაქცინის შეძენას შევძლებთ. ჩვენ გვინდა, რომ ეს რიცხვი გავზარდოთ. იანვარშიც იგივე რაოდენობა გვექნება,”- განაცხადა კოჯამ.
მისივე თქმით, ქვეყანა მოლაპარკებებს Pfizer-ისა და BioNTech-ის ვაქცინების შეძენის მიზნითაც აწარმოებს.
ცნობისათვის, ბოლო მონაცემებით, თურქეთში კორონავირუსის 440 000-ზე მეტი შემთხვევაა დადასტურებული, დაღუპულთა რაოდენობა კი 12 000-ს აჭარბებს.
რაც შეეხება გერმანიას აქ კოვიდ 19-ის ვაქცინაციის პროგრამა, შესაძლოა, დეკემბერში დაიწყოს, – მედიის ინფორმაციით, ამის შესახებ ქვეყნის ჯანდაცვის მინისტრმა იენს შპანმა განაცხადა.
„არსებობს მიზეზი, ოპტიმისტურად ვიყოთ განწყობილები, რომ ევროპაში ვაქცინას მიმდინარე წელს დაამტკიცებენ და ჩვენ მაშინვე შეგვიძლია დავიწყოთ,“- აღნიშნა მინისტრმა.
მისი თქმით, გერმანიის ფედერალურ რეგიონებს სთხოვა, დეკემბრის შუა რიცხვებისთვის თავიანთი ვაქცინაციის ცენტრები მზად ჰქონდეთ.
„მირჩევნია, ცენტრები ვაქცინის დამტკიცებამდე რამდენიმე დღით ადრე მოვამზადოთ,“- აღნიშნა იენს შპანმა.
ჯანდაცვის მინისტრის განმარტებით, გერმანიამ ევროკომისიისა და ორმხრივი კონტრაქტების საშუალებით კოვიდ 19-ის ვაქცინის 300 მილიონზე მეტი დოზის უზრუნველყოფა მოახერხა, რაც ქვეყნისთვის საკმარისზე მეტია და ვაქცინის სხვა ქვეყნებისთვის გაზიარების შესაძლებლობასაც კი იძლევა.
