”ქუთაისში წინაასარჩევნო პერიოდიც და არჩევნებიც მშვიდობიან და სამართლიან გარემოში ჩატარდა” – ეს განცხადება ,,ქართული ოცნების მაჟორიტარი დეპუტატობის კანდიდატმა ზაზა ლომინაძემ გააკეთა. მისივე თქმით ოპონენტები ხელოვნურად ცდილობენ გაამწვავონ სიტუაცია.
,,ქუთაისში წინაასარჩევნო პერიოდიც და არჩევნებიც მშვიდობიან და სამართლიან გარემოში ჩატარდა. არჩევნები ჩატარდა დემოკრატიული პრინციპების და წესების დაცვით, რომელიც აღიარეს საუბნო კომისიის წევრებმა ოპოზიციური პარტიებიდან, რისი დასტურიცაა მათი ხელმოწერები ოქმებზე. 74000 ბიულეტენიდან ერთადერთ ბიულეტენში იქნა შეცდომა აღმოჩენილი, რომელიც იმავე დღეს ჩასწორდა.
ამასთანავე, საერთაშორისო საზოგადოებამ, ყველა ავტორიტეტულმა საერთაშორისო ორგანიზაციამ დაადასტურა, რომ 2020 წლის საპარლამენტო არჩევნები კონკურენტული და თავისუფალი იყო.
ყოველივე ამის ფონზე, ოპონენტები ცდილობენ ხელოვნურად გაამწვავონ სიტუაცია. ამისთვის მათი პარტიული ტელევიზიებისთვის პირდაპირ ეთერში იდგმება არეულობის სპექტაკლები და იქმნება ცრუ შთაბეჭდილება, თითქოს მთელი საქართველო იქ არის, რათა როგორმე საპროტესტო მუხტის იმიტაცია შექმნან.
დღეს, ქუთაისის საარჩევნო საოლქო კომისიასთან გამართული აქცია იყო მხოლოდ და მხოლოდ გამოძახილი ოპოზიციური პარტიების მცდელობისა- ჩაშალონ ცესკოს და საოლქო კომისიების მუშაობა, არ მისცენ შემაჯამებელი ოქმების შედგენის საშუალება. ამისთვის რაიონებიდან ჩამოიყვანეს ახალგაზრდები, რომლებმაც ნამდვილად არ იცოდნენ რას აპროტესტებდნენ. ისინი არ იცავდნენ უსაფრთხოების არცერთ ზომას.
პირადად მე და პარტია „ქართული ოცნება“, ნებისმიერ ეტაპზე , მზად ვართ ჩვენს ოპონენტებთან ერთად განვიხილოთ ყველა მათი პრეტენზია, მოსაზრება, გავმართოთ დიალოგი, ოღონდ არა ქუჩაში და არა დესტრუქციულად.”-განაცხადა ზაზა ლომინაძემ.
“ქართული ოცნება – დემოკრატიული საქართველოს” ქუთაისის მერობის კანდიდატის იოსებ ხახალეიშვილის განცხადებით, ოპოზიციას ქუთაისში არჩვენების შედეგების გაპროტესტების არავითარი საფუძველი არ აქვს.
მერობის კანდიდატის ქუთაისის 59-ე საოლქო საარჩევნო კომისიის შენობასთან დღეს გამართულ აქციას გამოეხმაურა და აღნიშნა, რომ ოპოზიციის მხრიდან ადგილი აქვს დესტრუქციულ ქმედებებს.
“სამწუხაროდ, უკვე რამდენიმე დღეა, ჩვენი მოსახლეობა და მთელი საერთაშორისო საზოგადოება ნათლად ხედავს, რომ ოპოზიციის მთავარი ამოცანა არა სამართლიანი შედეგის მიღება და კანონიერი გზებით მოქმედებაა, არამედ დესტრუქცია და არჩევნების ძალადობრივად, ხალხის ნების საწინააღმდეგოდ მითვისება.
ფაქტია, რომ ახლა, როდესაც საზოგადოებაში არ არის საპროტესტო მუხტი და არჩევნები აღიარა მთელმა საერთაშორისო საზოგადოებამ, ასევე, ეუთო/ოდირმა, აშშ-ისა და ბრიტანეთის ელჩებმა, ჩვენმა სტრატეგიულმა პარტნიორმა და პრაქტიკულად ყველა ავტორიტეტულმა საერთაშორისო აქტორმა დაადასტურა, რომ 2020 წლის საპარლამენტო არჩევნები კონკურენტული და თავისუფალი იყო, ოპონენტები ცდილობენ ხელოვნურად გაამწვავონ სიტუაცია.
ეს არის დესტრუქციული ქმედება ოპოზიციის მხრიდან, რომელსაც არავითარი საფუძველი არ აქვს, განსაკუთრებით ქუთაისში იმის მტკიცებით, რომ არჩევნების შედეგები არასწორად იქნა დათვლილი. მათმა ლიდერმა, გრიგოლ ვაშაძემაც კი აღიარა და მადლობა გადაუხადა ქუთაისს იმისთვის, რომ არჩევნები ჩატარდა მშვიდ, წყნარ გარემოში, ერთადერთი ოქმი იყო, რომელსაც შესწორება გაუკეთდა და ამას საარჩევნო კომისია განიხილავდა, აქ სხვა არანაირი ხარვეზი არ ყოფილა და მათი ქმდებები მხოლოდ ტყუილს ემსახურება.
როდესაც ჩვენ ქვეყანაში და ჩვენ ქალაქშიც ყოველდღიურად კორონავირუსის ასობით შემთხვევა ფიქსირდება, გაუგებარია რას ემსახურება ოპოზიციის მიერ გამოგონილი და ყალბი საბაბით ადამიანების შეკრება.
ჩვენ ვაგრძელებთ საქმიანობას და ველოდებით ამომრჩევლების მაღალ აქტიურობას მეორე ტურშიც”, – განაცხადა იოსებ ხახალეიშვილმა.
