ჭიათურის მუნიციპალიტეტში, კაცხის სვეტსა და მღვიმევის მონასტერთან ტურისტული და რეკრეაციული ინფრასტრუქტურის მოწყობა იგეგმება. დეტალური საპროექტო-სახარჯთაღრიცხვო დოკუმენტაციის მომზადებასა და სამშენებლო სამუშაოების შესრულებაზე შესყიდვა მუნიციპალური განვითარების ფონდმა გამოაცხადა.
შესყიდვის სავარაუდო ღირებულება 1 707 667 ლარია. ტენდერში წინადადებების მიღება 6 სექტემბერს იწყება და 11 სექტემბერს სრულდება.
სატენდერო დოკუმენტაციის მიხედვით, Design–Build მეთოდით, ჭიათურის მუნიციპალიტეტში მდებარე მღვიმევის დედათა მონასტრის ტურისტული და რეკრეაციული ინფრასტრუქტურის, ასევე კაცხის სვეტის გადმოსახედის და მასთან არსებული ბილიკის დეტალური საპროექტო-სახარჯთაღრიცხვო დოკუმენტაცია უნდა მომზადდეს და შესაბამისი სამშენებლო სამუშაოები შესრულდეს.
ტექნიკური დავალებით, მღვიმევის დედათა მონასტრის პროექტის განხორციელებისას სრულფასოვნად უნდა იქნეს გათვალისწინებული:
ძირითადი ბეტონის კიბისა და საფეხმავლო ბილიკის რეაბილიტაცია: ასასვლელი გზის დახრილობის მაქსიმალური შემცირება, ცალკეულ მონაკვეთებში ბილიკის შეძლებისდაგვარად/საჭიროებისამებრ გაფართოება, არასტანდარტული საფეხურების ერთგვაროვან სისტემაში მოყვანა და მოპირკეთება სპეციალური, მოცურების საწინააღმდეგო მასალებით;
უსაფრთხოების მოაჯირები: მონასტრამდე ასასვლელი საფეხმავლო გზის (მთელ პერიმეტრზე დაახლოებით 200 მეტრი) და არსებული კელიების (სათავსოების) ღია ზონებში ერთიანი, მყარი და გარემოსთან ესთეტიკურად თავსებადი უსაფრთხოების მოაჯირების დამონტაჟება;
არსებული ლითონის კიბის კონსტრუქციის რესტავრაცია: უშუალოდ მონასტერში ასასვლელი ლითონის კიბის ელემენტების, მისი საფეხურებისა და მოსასვენებელი ბაქნების დეტალური შესწავლა, კონსტრუქციული აღდგენა და ანტიკოროზიული დამუშავება;
სანიტარული კვანძის რეაბილიტაცია: ლითონის კიბის მოპირდაპირედ მდებარე არსებული სველი წერტილების – ორი ცალკე მდგომი შენობის (ოთხი სათავსოს) სრული მოწესრიგება, მასთან არსებული დამხმარე კიბის საფეხურების აღდგენა, ობიექტის ელექტროენერგიით უზრუნველყოფა და შიდა/გარე განათების მოწყობა;
მოსასვენებელი სივრცეებისა და საპარკე ინვენტარის მოწყობა: გამწვანების ზოლში არსებული ორი მოსასვენებელი ბაქნის კეთილმოწყობა და ახალი, ისტორიულ ლანდშაფტთან ჰარმონიულად ინტეგრირებული საპარკე სკამების მონტაჟი.
რაც შეეხება კაცხის სვეტის გადმოსახედის და მასთან არსებული საფეხმავლო ბილიკის პროექტს, ტენდერით მოთხოვნილია:
საფეხმავლო ეკო-ბილიკის მშენებლობა: გადასახედამდე მისასვლელი ბილიკის მოწყობა მხოლოდ ეკოლოგიური და ბუნებრივი მასალებით. სამუშაოები მკაცრად უნდა განხორციელდეს ხელით ან მცირე მექანიზაციით, მძიმე სამშენებლო ტექნიკის გამოყენებისა და ნიადაგის მასშტაბური მოჭრის გარეშე;
უსაფრთხოების დამცავი ბარიერების მოწყობა: მარშრუტის გასწვრივ არსებულ ციცაბო მონაკვეთებსა და ღია გადასავარდნებზე ხისა და მსუბუქი ლითონის/ბაგირების კომბინირებული, მყარი დამცავი მოაჯირებისა და ბარიერების დამონტაჟება;
გადასახედი მოედნის მოწყობა: კაცხის სვეტის ხედზე ორიენტირებული გადასახედი მოედნის მოწყობა, რომლის კონსტრუქციაც უნდა იყოს მაქსიმალურად მსუბუქი და აღჭურვილი დამცავი მოაჯირებით;
საინფორმაციო ნავიგაციის სისტემის მოწყობა: ტერიტორიის აღჭურვა საინფორმაციო დაფებით, მცირე მოსასვენებელი სივრცითა და ანტივანდალური ნაგვის ურნებით.
როგორც სატენდერო დოკუმენტაციაში ვკითხულობთ, პროექტი ორიენტირებულია იმაზე, რომ რეაბილიტაციის პროცესი არ შემოიფარგლოს მხოლოდ ტექნიკური აღდგენით.
„იგი უნდა იქცეს კვლევით, კულტურულად და ეკოლოგიურად გააზრებულ ჩარევად, რომელიც შეინარჩუნებს ობიექტების არქიტექტურულ იერსახეს, სივრცობრივ სტრუქტურას, ისტორიულ ავთენტურობასა და უნიკალურ ბუნებრივ ლანდშაფტს“, – აღნიშნულია დოკუმენტაციაში.
