ქუთაისის მერიაში ფრაქცია “ნაციონალური მოძრაობის” თავმჯდომარის, გიგა შუშანიას ბრიფინგს გამოეხმაურნენ. ქალაქის მერის მოადგილის, ნინო თვალთვაძის განცხადებით, რიონისპირა სახლების რეაბილიტაციის პროექტი განმეორებით უახლოეს პერიოდში გამოცხადდება.
“ოპოზიციის განცხადება წარმოადგენს სამწუხარო სპეკულაციას. რა თქმა უნდა, რიონისპირა სახლების რეაბილიტაცია აუცილებლად განხორციელდება. მუნიციპალური განვითარების ფონდმა უკვე გააკეთა ოფიციალური განცხადება იმის თაობაზე, რომ უახლოეს პერიოდში ტენდერი ხელახლა გამოცხადდება. ტენდერი არ გაუქმებულა. ეს არის სახელშეკრულებო ურთიერთობა, რომელიც არსებობდა მგფ-სა და კონკრეტულ კომპანიას შორის და რომელიც გარკვეული პრეტენზიების გამო შეწყდა. გამომდინარე იქედან, რომ ქუთაისის მუნიციპალიტეტი არ წარმოადგენს ხელშეკრულების ოფიციალურ მხარეს, დეტალებზე ვერ ვისაუბრებ.
მერია ჩართული იყო პროცესში, ვესწრებოდით ყველა განხილვას, ვმონაწილეობდით კონცეფციის და ვიზუალის შემუშავებაში, კულტურული მემკვიდრეობის სააგენტოსთან კონსულტაციებში, მოსახლეობასთან კომუნიკაციაში. ხელშეკრულების კონკრეტულ დეტალზე საუბარი კი მხოლოდ მგფ-ს შეუძლია. რაც შეეხება იმ ბრალდებას , რომ ქუთაისში შეჩერდა ყველა ინფრასტრუქტურული პროექტი, ესეც სრული სიცრუეა.
ყველაზე თვალსაჩინო მაგალითი კი ქუთაისის საერთაშორისო უნივერსიტეტია, რომელიც არაერთხელ იქნა გამოცხადებული, როგორც ჩაშლილი და ტყუილი დაპირება და დღეს ყველა ვხედავთ სრულიად ახალ, რეგიონისა და ქალაქისთვის უმნიშვნელივანეს ინფრასტრუქტურას, რომელიც მზადაა უმასპინძლოს პირველ სტუდენტებს. ასევე მიუხედავად პანდემიისა, ქალაქში არ შეწყვეტილა არცერთი ინფრასტრუქტურული პროექტი, გეგმის მიხედვით გრძელდება გზების, სკვერების, სახელოვნებო და სპორტული სკოლების რეაბილიტაცია”, – განაცხადა ნინო თვალთვაძემ.
რიონისპირა სახლების პროექტი მკვდარშობილი იყო და მხოლოდ სახელად იყო გამოცხადებული – გიგა შუშანია