ოპოზიცია „ქართული ოცნების“ პასუხის მოლოდინშია – ბოიკოტის რეჟიმში მყოფმა შვიდმა პარტიამ ფასილიტატორ ელჩებს წერილობით მიაწოდეს ინფორმაცია საკუთარ მოთხოვნებთან დაკავშირებით და მიუხედავად იმისა, რომ დეტალებზე არ ისაუბრეს, მაინც აღნიშნეს, რომ მათი მოთხოვნები არ შეცვლილა – კვლავ რიგგარეშე არჩევნებს, ცესკოს ადმინისტრაციის ცვლილებასა და პოლიტპატიმრების გათავისუფლება.
თუმცა „ოცნებაში“ კვლავ კატეგორიულად აცახდებენ, რომ მათთვის რიგგარეშე არჩევნები წითელი ხაზია. მაშ რაზე შეიძლება ოპოზიციასა და ხელისუფლებას შორის კონსენსუსი მოხდეს, ჯერჯერობით უცნობია. შეხვედრა გაიმართა ამერიკის ელჩის მოადგილის რეზიდენციაში.
„ყველა ის მოთხოვნა, რაც არსებობდა ოპოზიციის მხრიდან და ჩვენი ხედვა, როგორ უნდა განიმუხტოს კრიზისი და როგორ უნდა წავიდეს ქვეყანა წინ, ჩამოყალიბებული, დეტალური, წერილობითი პოზიციის სახით გადავეცით ელჩებს. ჩვენი თხოვნა იყო, რომ მათ, როგორც ფასილიტატორმა ელჩებმა ეს პოზიცია ოფიციალურად მიაწოდონ „ქართულ ოცნებას“ და ველოდებით ასეთივე ოფიციალურ, დოკუმენტირებულ პასუხს.
ჩვენი პოზიცია პარლამენტის ბოიკოტთან დაკავშირებით არის უცვლელი, ვინაიდან არაფერი ისეთი, რაც ამ პოზიციას შეგვაცვლევინებდა, „ოცნებისგან“ არ მოსულა. მათგან იყო შემოთვლილი ძალიან ბუნდოვანი წინადადებები, რა წინადადებები, ვერ გეტყვით,” – განაცხადა „ევროპული საქართველოს“ ერთ-ერთმა ლიდერმა დავით ბაქრაძემ.
„წერილობითი მოთხოვნები გადავეცით ფასილიტატორებს. ველოდებით ასეთივე წერილობით პასუხს „ქართული ოცნებიდან“,“ – აღნიშნა „ნაციონალური მოძრაობის“ წევრმა კობა ნაყოფიამ.
„ლელოს“ ლიდერმა მამუკა ხაზარაძემ განაცხადა, რომ მათ ელჩება დრო სთხოვეს იმისთვის, რომ „ოცნება“ საბოლოოდ ჩამოყალიბდეს. „ფასილიტატორებმა გვთხოვეს, რომ მიგვეცა დრო, სანამ ჩვენ მივიღებთ „ქართული ოცნებიდან“ ჩამოყალიბებულ წინადადებებს და ამის მერე იმედია, რომ მოხდება მესამე რაუნდი, სადაც პოზიციები შეჯერდება ან არ შეჯერდება,“ – განაცხადა მამუკა ხაზარაძემ.
ალეკო ელისაშვილმა კი განაცხადა, რომ „ოცნებისგან“ კომრპომის რომ არ ელოდებოდნენ არც ელჩებს აწვალებდნენ და არც თავად იწვალებდნენ. „არც ჩვენ ვართ პატარა ბავშვები, რომ გვეწვალა და არც ელჩები, რომ ვაწვალებდეთ. უზარმაზარ შრომას ეწევიან,“ – აღნიშნა პარტია „მოქალაქეების“ ლიდერმა ალეკო ელისაშვილმა.
„სტრატეგია აღმაშენებლის“ თავმჯდომარე გიორგი ვაშაძე ამბობს, რომ ელჩებისთვის გადაცემული დოკუმენტი მას შემდეგ გასაჯაროვდება, რაც „ქართული ოცნებისგან“ საპასუხო წერილობით პასუხს მიიღებენ.
საქართველოში ევროკავშირის წარმომადგენლობის ხელმძღვანელი კარლ ჰარცელი კი იმედოვნებს, რომ ოპოზიციასა და ხელისუფლებას შორის მოლაპარაკებებში წინსვლა იქნება. როგორც ჰარცელმა დღევანდელი შეხვედრის შემდეგ აღნიშნა, დისკუსიები ისევ გაგრძელდება.
„ეს მნიშვნელოვანი შეხვედრა იყო, რადგან დავაზუსტეთ, რომ დისკუსიები კიდევ გაგრძელდება. ჩვენ ვაგრძელებთ 7 პარტიასთან საუბარს. ახლა მხედველობაში მივიღებთ ამ ყველაფერს, თუ როგორ გავაგრძელებთ გამოსავლის გზის ძიებას. მეტი არაფრის თქმა არ შემიძლია, ეს დისკუსია გაგრძელდება და იქნება ძალიან რთული,“ – განაცხადა კარლ ჰარცელმა.
ანალიტიკოსი პაატა ზაქარეიშვილი კი „რეზონანსთან“ ფიქრობს, რომ ოპოზიციამ ახლა პოზიციები თუ დათმო და ნაწილი მაინც პარლამენტში შევიდა, ეს თვითმკვლელობის ტოლფასი იქნება. მისი აზრით, ან ყველა ერთნაირად უნდა შევიდეს ან კიდევ არა. ზაქარეიშვილი ამბობს, რომ ახლა ფაქტობრივად ვაჭრობა მიდის, ამიტომაც ოპოზიცია ფიქრობს, რომ ის წაუგებელ თამაშს თამაშობს და უნდა რაც შეიძლება მეტი მოგება ნახოს. თუმცა დიდი ალბათობით „ოცნება“ დათმობაზე არ წავა. ის დამოუკიდებლად კონკრეტულ პოლიტკოსებთან დიდი ალბათობით მოლაპარაკებებსაც აწარმოებს და იმედია ქვს, რომ მათ ნაწილს გადაიბირებს.
„თუ ოპოზიციამ პრინციპულობა ვერ გამოიჩინა და გატყდა , ეს თვითმკვლელობის ტოლფასი იქნება. დაუშვებელია, რომ ნაწილი მაინც შევიდეს და ნაწილი გარეთ დარჩეს. ვინც შევა, ჩათვალეთ, რომ ის პოლიტიკურად გაბანკნოტებულია. ან ერთად უნდა შევიდნენ და თქვაან, რომ სახელმწიფოებრივი აზროვნებიდან გამომდინარე სხვა გზა არა აქვთ. ქვეყანა თავზე გვენგრევა და მხოლოდ „ოცნების“ იმედად სახელწიფოს ვერ დავტოვედბით. სხვაგვარად მხოლოდ ნაწილის შესვლა კატასტროფა იქნება.
ირაკლი კობახიძე ყოველ დღე გამოვა და მათ დამცირებას დაიწყებს. ასევე ამომრჩევლის თვალში მათი პოლიტიკური დივიდენდი ნულის ტოლფასი გახდება. არ გამოვრიცხავ, რომ „ოცნება“ ცალკეულ პოლიტიკოსებთან მოლაპარაკებებსაც კი აწარმოებდეს. ამაში გასაკვირიც არაფერია. ამიტომაც არც ის იქნება მოულოდნელი ნაწილი მათგანი თუ შევა. ახლა ნერვების ომი მიდის და ვისაც მეტი ნებისყოფა ექნება ის გაიმარჯვებს“, – ამბობს პაატა ზაქარეიშვილი „რეზონანსთან“.