პირადობის ელექტრონულ მოწმობაზე (ID ბარათზე) დატანილი QR კოდის მეშვეობით, სტუდენტებს საშუალება ეძლევათ, მარტივად ისარგებლონ სხვადასხვა ფასდაკლებით. ამის შესახებ ინფორმაციას სახელმწიფო სერვისების განვითარების სააგენტო ავრცელებს.
სააგენტოს ცნობითვე, დოკუმენტზე სტუდენტის აქტიური სტატუსის დატანას თავად სააგენტო უზრუნველყოფს, ხოლო აღნიშნული მომსახურება სტუდენტებისთვის სრულიად უფასოა.
სისტემა სტუდენტებს შესაძლებლობას აძლევს, გამარტივებული წესით ისარგებლონ შეღავათებით ისეთ სერვისებზე, როგორებიცაა: საზოგადოებრივი და სარკინიგზო ტრანსპორტით მგზავრობა; მუზეუმებსა და ბოტანიკურ ბაღებში ვიზიტი და ა.შ.
„თუ პირი განათლების სამინისტროს საგანმანათლებლო დაწესებულებათა რეესტრში რეგისტრირებულია როგორც უმაღლესი საგანმანათლებლო დაწესებულების სტუდენტი, რომელსაც სტატუსი შეჩერებული/შეწყვეტილი არ აქვს, პირადობის (ბინადრობის) ელექტრონული მოწმობის გაცემის თაობაზე გადაწყვეტილების მიღებისას, ან თუ პირი უკვე ფლობს პირადობის (ბინადრობის) ელექტრონულ მოწმობას, რომელიც შეიცავს QR კოდს, მისი მოთხოვნის შემთხვევაში, სახელმწიფო სერვისების განვითარების სააგენტოს მონაცემთა ელექტრონულ ბაზაში აისახება ინფორმაცია სტუდენტის სტატუსის შესახებ, რომლის გადამოწმება შესაძლებელი იქნება პირადობის (ბინადრობის) ელექტრონულ მოწმობაზე დატანილი QR კოდის მეშვეობით.
დაინტერესებულ პირს შეუძლია სტუდენტის სტატუსის შესახებ ინფორმაციის სააგენტოს მონაცემთა ელექტრონულ ბაზაში ასახვისა და შესაბამისად, პირადობის (ბინადრობის) ელექტრონულ მოწმობაზე არსებული QR კოდის საშუალებით ხელმისაწვდომობის მოთხოვნით მიმართოს სახელმწიფო სერვისების განვითარების სააგენტოს ტერიტორიულ სამსახურებს, იუსტიციის სახლის ფილიალებსა და მობილურ იუსტიციის სახლებს.
განცხადების წარდგენა შესაძლებელია, როგორც პირის სახელზე პირადობის (ბინადრობის) ელექტრონული მოწმობის გაცემის განცხადებასთან ერთად, ისე უკვე გაცემულ დოკუმენტზე.
სტუდენტის სტატუსის შესახებ ინფორმაციის მონაცემთა ელექტრონულ ბაზაში ასახვასა და დოკუმენტზე დატანილი QR კოდის მეშვეობით გადამოწმების ხელმისაწვდომობის თაობაზე სააგენტო გადაწყვეტილებას იღებს პირადობის (ბინადრობის) ელექტრონული მოწმობის გაცემისათვის დადგენილ ვადაში, ხოლო უკვე გაცემული პირადობის (ბინადრობის) ელექტრონული მოწმობის შემთხვევაში, შესაბამისი განაცხადის წარდგენიდან 5 სამუშაო დღის ვადაში“, – ნათქვამია სახელმწიფო სერვისების სააგენტოს ვებგვერდზე გამოქვეყნებულ ინფორმაციაში.
სააგენტო ასევე განსაზღვრავს, რომ აღნიშნულ მომსახურებაზე უარი ითქმება, თუ:
- საგანმანათლებლო დაწესებულებების რეესტრში არ იძებნება ინფორმაცია პირის შესახებ;
- საგანმანათლებლო დაწესებულებების რეესტრში პირი არ არის რეგისტრირებული, როგორც უმაღლესი საგანმანათლებლო დაწესებულების სტუდენტი;
- საგანმანათლებლო დაწესებულებების რეესტრის მონაცემების თანახმად, პირს სტუდენტის სტატუსი შეჩერებული/შეწყვეტილი აქვს;
- შეჩერებულია პირადობის (ბინადრობის) ელექტრონული მოწმობის მოქმედება.
დაინტერესებულ პირს აგრეთვე შეუძლია ზემოაღნიშნულ უფლებამოსილ ორგანოებს მიმართოს სტუდენტის სტატუსის ხელმისაწვდომობის შეზღუდვის მოთხოვნით, რომლის დაკმაყოფილების შემთხვევაში, ინფორმაცია აღნიშნული სტატუსის შესახებ პირადობის (ბინადრობის) ელექტრონულ მოწმობაზე არსებული QR კოდის საშუალებით აღარ იქნება ხელმისაწვდომი.
