დიდ ბრიტანეთში დაფუძნებული კომპანიის Dot Zinc Limited ვებგვერდზე money.co.uk, რომელიც მომხმარებლებს უძრავ ქონებაზე არსებული ფასების შედარების მომსახურებას სთავაზობს, მთვარეზე სახლის აშენების ღირებულება დაასახელა. სპეციალისტების განმარტებით. ამას დაახლოებით 60 მილიონ აშშ დოლარად შეძლებთ. ხარჯები ციურ სხეულზე სამშენებლო მასალისა და ხელსაწყოების ატანას, ასევე იქ ხელოსნების გაგზავნას ითვალისწინებს. ამის გარდა, დედამიწის ბუნებრივ თანამგზავრზე სიცოცხლისთვის ხელსაყრელი პირობების შესაქმნელად სხვადასხვა ძვირადღირებული ტექნოლოგიის გამოყენება მოგიწევთ.
პირველ რიგში, მთვარეზე სახლის ასაშენებლად იქ მიწის ნაკვეთზე ლიცენზია უნდა შეიძინოთ. საფინანსო კომპანიის წარმომადგენელთა განცხადებით, ამისთვის სხვადასხვა ადგილმდებარეობის მიხედვით ერთ აკრში, რაც დაახლოებით 4 ათას კვადრატულ მეტრს შეადგენს, 20 ათასიდან 130 ათასამდე აშშ დოლარის გადახდა მოგიწევთ. ამის გარდა, მაგალითისთვის, 76 კვადრატული მეტრი ფართობის მქონე სახლის ასაშენებლად მინიმუმ 26 ხელოსანი დაგჭირდებათ. მათი დედამიწის ბუნებრივ თანამგზავრზე გაგზავნა, ასევე, იქ სამშენებლო მასალის, ხელსაწყოებისა და აღჭურვილობის წაღება საშუალოდ 8 მილიონი აშშ დოლარი დაჯდება. აღსანიშნავია, რომ ილონ მასკის კომპანია SpaceX ჩვენი პლანეტის ორბიტაზე 200 კილოგრამი ტვირთის ტრანსპორტირების სანაცვლოდ 1 მილიონ აშშ დოლარს ითხოვს.
მთვარეზე სახლის ასაშენებლად ისეთი მასალა დაგჭირდებათ, რომელიც ციურ სხეულზე არსებულ ექსტრემალურ ტემპერატურას, რადიაციასა და მეტეორების წვიმას გაუძლებს. ამასთან ერთად, იქ ჰაერის კონდიცირებისთვის საკმაოდ მძლავრი დანადგარის დამონტაჟება, თბოიზოლაციისთვის კი სპეციალური მასალის გამოყენება მოგიწევთ. საერთო ჯამში, შენობაში სიცოცხლისთვის ხელსაყრელი პირობების შესაქმნელად დაახლოებით 40 მილიონი აშშ დოლარია საჭირო. კომპანიის წარმომადგენლების გამოთვლებით, ერთი ასეთი სახლის ელექტროენერგიით მომარაგება 34 მზის პანელით იქნება შესაძლებელი, რომლის ფასიც 23,500 აშშ დოლარს შეადგენს. მის სანაცვლოდ მცირე ბირთვული რეაქტორის განთავსებაც შეგიძლიათ, თუმცა ამისთვის თითქმის 1,5 მილიარდი აშშ დოლარის გადახდა მოგიწევთ.
დამატებითი ხარჯების გაღება იქნება საჭირო სათბურებისთვის, სადაც საკვების მოყვანას შეძლებთ, ვინაიდან მისი დედამიწიდან მთვარეზე ტრანსპორტიება საკმაოდ დიდ თანხებთან იქნება დაკავშირებული. ამის გარდა, იქ ერთ ოჯახს წელიწადში საშუალოდ 5,4 ტონა წყალი დასჭირდება, ამიტომ მის გადასამუშავებლად სპეციალური ტექნოლოგიის გამოყენება მოგიწევთ. კომპანიის წარმომადგენელთა განცხადებით, მას შემდეგ, რაც მთვარეზე პირველი საცხოვრებელი სახლის ასაგებად მუშებსა და ხელსაწყოებს გაგზავნიან, დანარჩენი სახლების აშენება იქ შედარებით იაფი, დაახლოებით 51 მილიონი აშშ დოლარი დაჯდება.
