აშშ-ის დაავადებათა კონტროლის ცენტრის ბოლო რეკომენდაციის თანახმად, თავშეყრის ადგილებში, განსაკუთრებით მაღაზიებსა და აფთიაქებში უნდა გამოიყენებოდეს ნიღბები, თუმცა ეს რეკომენდაცია არ ვრცელდება 2 წლამდე ასაკის ბავშვებსა და იმ ადამიანებზე, რომელთაც სუნთქვის გაძნელება აქვთ, – ამის შესახებ ინფექციონისტი, მაია ბუწაშვილი Facebook-ზე წერს.
მისი თქმით, ეს განსაკუთრებით ხაზგასმით არის ნათქვამი ქსოვილისგან დამზადებული პირბადეების შესახებ.
მაია ბუწაშვილი ეხმაურება საკითხს იმის შესახებ, რეკომენდებულია თუ არა მცირე ასაკის ბავშვებისთვის პირბადის გამოყენება?
„ბავშვებს ნიღბით უფრო მეტად უჭირთ სუნთქვა, ვიდრე მოზრდილებს.
ბავშვს სუნთქვის გაძნელების შემთხვევაში, თავისით არ შეუძლია ნიღბის მოხსნა და ეს შეიძლება მოხრჩობის რისკის შემცველი აღმოჩნდეს.
ბავშვები ხშირად ეხებიან ნიღაბს და ამიტომ ნიღბის სწორად გამოყენება მათთან შეუძლებელია“, – წერს მაია ბუწაშვილი.
მისი განმარტებით, ვრცელდება რამდენიმე პროფილაქტიკური რეკომენდაცია მცირე ასაკის ბავშვებისათვის:
„ეტლით გასეირნებისას სასურველია ეტლს გადავაფაროთ. აღნიშნული რეკომენდაცია ისედაც არსებობდა ტრანსპორტით დატვირთულ ქუჩებში სეირნობისას გამონაბოლქვის ჩასუნთქვის რისკის შესამცირებლად.
მეძუძურმა დედებმა სასუნთქი გზების დაავადების თუნდაც მცირედ გამოხატული სიმპტომების შემთხვევაში, უნდა გამოიყენონ პირბადე ბავშვის კვებისას.
გარედან სახლში შემოსვლისას ჯერ მოზრდილმა უნდა დაიბანოს ხელი და შემდეგ დაბანოს ბავშვს“, – ვკითხულობთ მაია ბუწაშვილის მიერ Facebook-ზე გამოქვეყნებულ ინფორმაციაში.
