ბაღდათში მომხდარი ტრაგედიის შედეგად დაღუპული ოჯახისთვის მერიას საცხოვრებელი ფართი გამოყოფილი ჰქონდა. მრავალშვილიანი ოჯახის საცხოვრებელი ყოფილი სტამბის შენობაში მდებარეობდა, ტრაგედიის ადგილიდან დაახლოებით 200-300 მეტრში.
როგორც ბაღდათის მერი სააგენტო Topnews.com.ge-სთან განმარტავს, საცხოვრებელი ფართის არსებობის მიუხედავად, ოჯახი მიტოვებულ შენობაში თვითნებურად გადავიდა.
„ამ ოჯახს ჩვენ გამოვუყავით ფართი 2012 წელს, ყოფილი სტამბის შენობაში. მათ სახელზე გადავაფორმეთ საცხოვრებელი და უსასყიდლოდ გადავეცით. იქ ცხოვრობდნენ წლები. ვერ გეტყვით, რომ საუკეთესო პირობები ჰქონდათ, მაგრამ ვიცი, რომ უფასო სასადილოთი სარგებლობდნენ ყოველდღე. ამასთან, სოციალურ დახმარებასა და პენსიას იღებდნენ თვეში სადღაც 1180 ლარამდე. მერიიდანაც რაც დახმარებებია ერთჯერადი მრავალშვილიანობაზე, წამლებზე და ა.შ. ყველაფერს იღებდნენ.
როგორც გავიგეთ, გარდაცვლილი ქალბატონის დედა ცალკე გადავიდა საცხოვრებლად იმ სახლში, სადაც გუშინ ხანძარი გაჩნდა. აღნიშნული სახლი წლების მანძილზე მიტოვებული იყო, კერძო იყო და არავინ არ ცხოვრობდა. როგორც აღმოჩნდა, დედასთან გადასულა საცხოვრებლად გარდაცვლილი ქალბატონი შვილებთან ერთად. ჩვენთვის არავის მოუმართავს, არც ამ მიტოვებული სახლის მეპატრონეს, რომ ვინმე იქ უკანონოდ იყო შეჭრილი. მოხდა ეს უდიდესი ტრაგედია,“-ამბობს ბაღდათის მერი არჩილ გოგსაძე.
სოციალური მომსახურების სააგენტოს ქუთაისის სერვიცენტრის ხელმძღვანელი ნინო ჭიღლაძე Topnews.com.ge-სთან განმარტავს, რომ დღევანდელი მდგომარეობით ოჯახი სოციალურ დახმარებას იღებდა.
„სოციალური დახმარება ამ ოჯახს მოხსნილი არ ჰქონდა. ისინი იღებდნენ შემწეობას. შეჩერებული ჰქონდათ 2019 წლის ოქტომბერში, შემდეგ გადამოწმდნენ და ისევ გაუგრძელდათ დახმარება. დეკემბერში უკვე სრულად ჩაერიცხათ თანხა და შეჩერების პერიოდის თვეებიც აუნაზღაურდათ. თვეში 680 ლარს იღებდნენ მხოლოდ სოციალურ დახმარებისას,“-ამბობს ნინო ჭიღლაძე.
შეგახსენებთ, რომ გუშინ, გვიან ღამით, ბაღდათში, წერეთლის ქუჩაზე მდებარე საცხოვრებელ სახლს ცეცხლი გაუჩნდა. შემთხვევის ადგილზე სახნაძრო-სამაშველო ჯგუფი 2 წუთში გამოცხადდა. ადგილზე მისული მეხანძრე-მაშველების ინფორმაციით, იწვოდა ხის ორსართულიანი საცხოვრებელი სახლი. ხანძარი გავრცელებული იყო, დაახლოებით, 200 კვ/მ ფართობზე. ხანძრის ლოკალიზაციის შემდეგ, ღია ცეცხლში შესულმა მეხანძრე-მაშველებმა 5 ადამიანის ცხედარი იპოვეს. მათ შორის იყო 1 ქალი და 4 არასრულწლოვანი. მოგვიანებით, ადგილზე ნაპოვნი იქნა კიდევ ერთი – ხანშიშესული ქალის ცხედარი.
მომხდართან დაკავშირებით, შინაგან საქმეთა სამინისტრომ გამოძიება საქართველოს სისხლის სამართლის კოდექსის 187-ე მუხლის მე-4 ნაწილით დაიწყო.
Topnews.com.ge
