უვიზო მიმოსვლის დაკარგვის საფრთხე – საგარეო საქმეთა ყოფილი მინისტრი, ნინო კალანდაძე განმარტავს, რა პრობლემები შეიძლება შეექმნათ საქართველოს მოქალაქეებს, რომლებიც საზღვარგარეთ ცხოვრობენ ან აწი აპირებენ წასვლას.
კალანდაძე ამბობს, რომ მათ, ვისაც საბუთები ბოლომდე მწყობრში არ აქვთ, ან ახლა აწესრიგებენ, მათ მიმართ ევროპა სავარაუდოდ, სახელმწიფო პოლიტიკას გადახედავს და უფრო მკაცრი იქნება.
შესაძლებელია, ეს ასევე გავრცელდეს რიგით მოქალაქეებზე, რომლებსაც არ ექნებათ ძალიან მყარი დოკუმენტაცია წარსადგენი მიზნობრიობის დასადასტურებლად – ამბობს კალანდაძე.
“პირველი სამიზნეები თუ იქნებიან ვთქვათ სახელმწიფო მოხელეები, დიპლომატიური პასპორტების მფლობელი პირები, ის პირები, რომლებიც უშუალოდ ექცევიან სანქციათა ჩამონათვალში, დიდი ალბათობით, ეს ასევე შეეხება იმ ადამიანებს, ვინც დღეის მდგომარეობით არალეგალური მიგრანტები არიან, რომელთა მიმართაც ალბათ სახელმწიფო პოლიტიკა გადაიხედება და გამკაცრდება. ასეთი ბევრია, ვისაც საბუთები ბოლომდე არ აქვს მოგვარებული, მაგრამ უკვე იმყოფება ევროპაში ან ახლა აპირებდა წასვლას იმ იმედით, რომ იქ დარჩებოდა. მათ მიმართ იქნება განსაკუთრებული სიფრთხილე საზღვრებზე და თავად დედაქალაქებში. შესაძლებელია, რასაკვირველია, რომ ეს ასევე გავრცელდეს რიგით მოქალაქეებზე, რომლებსაც არ ექნებათ ძალიან მყარი საფუძველი და ძალიან მყარი დოკუმენტაცია წარსადგენი მიზნობრიობის დასადასტურებლად”, – აცხადებს ნინო კალანდაძე.
სტრატეგიული ანალიზის ცენტრის დამფუძნებელი, გიორგი რუხაძე ამბოობს, რომ ევროკომისიის ახალი ანგარიში უფრო გზავნილია საქართველოს მოსახლეობისთვის, რადგან “ოცნება” რომ “თავის ზნე-ჩვეულებებს ვერ და არ შეიცვლის”, ეს უკვე გასაგებია ბრიუსელისთვის.
თუ საქართველოს მოსახლეობა ვერ მოახერხებს ვითარების შეცვლას, ბრიუსელი იძულებული გახდება, რომ უვიზო მიმოსვლა შეაჩეროს – ამბობს რუხაძე.
უფრო დიდი ალბათობაა იმისა, რომ ჯერ ეს შეეხოს ქართული ოცნების ელიტას, დიპლომატიური და სამსახურეობრივი პასპორტების მფლობელებს და ამჯერად, ინდივიდუალურად ქვეყნები ვეღარ დაიცავენ. თუ ეს ტრაექტორია გაგრძელდა, შემდეგი ეტაპი, რა მიმართულებითაც საქართველო მიდის, აუცილებლად იქნება მოსახლეობისთვსი უვიზო მიმოსვლის შეჩერება.
ეს უფრო გზავნილია საქართველოს მოსახლეობისთვის და არა საქართველოს ხელისუფლებისთვის, იმიტომ, რომ საქართველოს ხელისუფლება რომ თავის ზნე-ჩვეულებებს ვერ და არ შეიცვლის, ეს უკვე გასაგებია ბრიუსელისთვის. აქ გზავნილია საქართველოს მოსახლეობისთვის, რომ თუ საქართველოს მოსახლეობა ვერ მოახერხებს ვითარების შეცვლას, ბრიუსელი იძულებული გახდება, რომ უვიზო მიმოსვლა შეაჩეროს, იმიტომ, რომ უვიზო მიმოსვლა ეს არ არის პრივილეგია. საქართველოს უვიზო მიმოსვლა იმიტომ კი არ აქვს, რომ ქართველები კარგი ხალხი ვართ, იმიტომ, რომ საქართველო რეგიონშიც და მის მიღმაც უკეთესად ასრულდებდა ევროპულ რეკომენდაციებს”, – ამბობს გიორგი რუხაძე.
„საქართველომ შეიძლება სრულად დაკარგოს უვიზო რეჟიმი“ – ახალ ანგარიშში ევროკომისია მიუთითებს, რომ გარკვეულ ეტაპზე საქართველოს მთელ მოსახლეობას ემუქრება ევროკავშირის მიერ უვიზო მიმოსვლის შეჩერება.
ევროკომისია აცხადებს, რომ საქართველოში დემოკრატიული უკუსვლის „სისტემური და მიზანმიმართული ხასიათის გათვალისწინებით“, უვიზო მიმოსვლის შეჩერებას განიხილავს იმ ახალი წესების ფარგლებში, რაც ძალაში 2025 წლის 30 დეკემბერს შედის.
