ომის დაწყების შემდეგ, ამერიკის შეერთებული შტატების კონგრესში ამბობენ, რომ რუსული საფრთხისგან დაცული რეგიონში არც სხვა სახელმწიფოები არიან. კონგრესმენმა მაიკლ მაქქოლმა, რომელიც ქვედა პალატაში ტეხასის შტატს წარმოადგენს, დღეს ყველაზე მოწყვლად ქვეყნებად, საქართველო და მოლდოვა დაასახელა.
“ოდესა მისთვის ასაღებად ძალიან მნიშვნელოვანი და სტრატეგიული პორტია. ყირიმთან და მარიუპოლთან ერთად, შავი ზღვისგან უკრაინის ჩაჭრით, მას სრული ენერგეტიკული უპირატესობაც ეძლევა. ორი ყველაზე მეტად დაუცველი ნატოს არაწევრი მოკავშირე, რეგიონში, როგორც ვხედავ, საქართველო და მოლდოვაა. მათ უკვე დაკავებული აქვთ საქართველოს ტერიტორიის 20% და არიან მოლოდვაშიც. ახლა ის შეჭიდებულია უკრაინას. ვფიქრობ, იმაზე დიდ ლუკმას, რომლის გადაყლაპვაც შეუძლია, თუმცა ამ სცენარით, 3-4 დღე დასჭირდება გაფართოებას, მოლდოვასა და საქართველომდე, ან ბალტიის ქვეყნებამდე, რაც ცხადია, პუტინისთვის კარგად არ დამთავრდება,” – განაცხადა აშშ-ს კონგრესმენმა ტეხასის შტატიდან მაიკლ მაქქოლმა.
ეს არ არის პირველი შემთხვევაა, როდესაც კანონმდებლები რეგიონის სხვა ქვეყნებზე შიშობენ. გასულ კვირას, სენატორმა ბენ კარდინმა ჰკითხა ადმინისტრაციის მაღალჩინოსანს, რას აკეთებს შეერთებული შტატები იმისთვის, რომ საქართველომ და მოლდოვამ თავი დაიცვან, თუ რუსეთი ამ ქვეყნებში უფრო აგრესიულად იმოქმედებს. კვირის ბოლოს კი პრეზიდენტს ჰელსინკის კომისიამ მიმართა, უკრაინას, საქართველოს და მოლდოვას მთავარი არანატოელი მოკავშირეების სტატუსი მიანიჭოს.
“უკრაინა დიდი ქვეყანაა, მრავალრიცხოვანი მოსახლეობით. მას შეუძლია, ბრძოლა სამხრეთ და აღმოსავლეთ ტერიტორიების დაკარგვის ფონზეც გააგრძელოს. საქართველოში მოსახლეობა მცირერიცხოვანია. 2008 წელს, რუსები ძალიან ახლოს იყვნენ მისულები თბილისზე შესატევად, შეერთებული შტატები რომ არ ჩარეულიყო. 2022 წელს, რუსეთის სამხედრო ძალა ბევრად ეფექტურია. ვფიქრობ, საქართველო მეტად მოწყვლადია. თუმცა დროთა განმავლობაში, იმ ღონისძიებებით, რასაც შეერთებული შტატები ატარებს რუსეთის ეკონომიკის დასასუსტებლად და იზოლირებისთვის, რუსეთი უფრო მეტად სუსტი გახდება. დრო კი საქართველოს სასარგებლოდ მოქმედებს. თუ შემდგომ წლებში საქართველოს ამ საფრთხისგან დავიცავთ, მისი ვითარება გამოსწორდება,” – განაცხადა ჰადსონის ინსტიტუტის პოლიტიკურ-სამხედრო ანალიზის ცენტრის დირექტორმა.
დღეს შეერთებული შტატების სახელმწიფო დეპარტამენტი ევროპის საბჭოდან რუსეთის გასვლის გადაწყვეტილებას გამოეხმაურა. ადმინისტრაციაში თქვეს, რომ ამ ორგანიზაციაში რუსეთის არყოფნა მართებული იქნება.
“ჩვენ ვიცით, რომ რუსეთმა, ევროპის საბჭოს, გასვლის გადაწყვეტილების შესახებ შეატყობინა. მანამდე ჩვენ მივესალმეთ ევროსაბჭოს მხრიდან რუსეთის უფლების შეჩერებას, უკრაინაში აგრესიის გამო. ასევე მივესალმეთ საპარლამენტო ასამბლეის უკრაინის მხარდამჭერ პრინციპულ განცხადებას. ჩვენ ვიზიარებთ ევროსაბჭოს ღირებულებებს ადამიანის უფლებებზე, დემოკრატიასა და კანონის უზენაესობაზე. რუსეთი ამ ღირებულებებს არ იზიარებს და ვფიქრობ, მართებულია, რუსეთი ამ საბჭოს წევრი არ იყოს,” – ამერიკის შეერთებული შტატების სახელმწიფო დეპარტამენტის სპიკერმა ნედ პრაისმა
ევროპის საბჭოს ისტორიაში, დღემდე ორგანიზაციის დატოვების ერთადერთი პრეცენდენტი იყო. 1969 წლის დეკემბერში ის საბერძნეთმა დატოვა, რადგან ქვეყნის სათავეში მოსული სამხედრო ხუნტა დემოკრატიულ ღირებულებებს არ ცნობდა. საბერძნეთი ევროსაბჭოში “პოლკოვნიკების რეჟიმის” შეცვლის შემდეგ დაბრუნდა
