20 ივნისის მოვლენებში ბრალდებული პირების ამნისტიის განხილვას ოპოზიციის წარმომადგენლები დაესწრებიან. ისინი აპირებენ საკუთარი პოზიცია ამ მიმართულებით კიდევ ერთხელ დააფიქსირონ.
რაც შეეხება ამავე საკითხზე შემუშავებულ მეორე პროექტს – ოპოზიცია მის პარლამენტში დარეგისტრირებაზე ჯერ კიდევ თავს იკავებს.
ორივე ვარიანტი მიუღებელია “ნაციონალური მოძრაობისთვის”.
“ქართული ოცნების” ვერსია როგორ უნდა მოგეწონოს, როდესაც პრაქტიკულად მათ გამოიყენეს შარლ მიშელის დოკუმენტი იმისთვის, რომ მთლიანად სათავისოდ მიეღოთ ეს კანონპროექტი. ისინი მზად რომ ყოფილიყვნენ, რომ რეალურად ამნისტიის შესახებ კანონი მიღებულიყო ისეთი, რომელიც უპირველეს ყოვლისა მისაღები იქნებოდა საზოგადოებისთვის და მისაღები იქნებოდა თვითონ იმ ადამიანებისთვის, რომლებიც დაზარალებულები არიან 19-20 ივნისს, მაშინ ეს იქნებოდა ოპოზიციასთან ერთად შეჯერებული კანონპროექტი,” – აცხადებს პარლამენტის ფრაქციის “ერთიანი ნაციონალური მოძრაობა – ძალა ერთობაშია” წევრი ზაალ უდუმაშვილი.
პარლამენტის ფრაქცია “ლელო – პარტნიორობა საქართველოსთვის” თავმჯდომარის მოადგილის სალომე სამადაშვილის თქმით, ამნისტიის კანონი ისეთი სახით უნდა იქნას მიღებული, რომ ნიკა მელიას საქმეს შეეხოს.
“ეს იყო ის მიზეზი, რატომაც შემოთავაზებულ იქნა ამნისტიის კანონპროექტი მედიატორების მიერ. მე არ ვიცი, რამდენად არის შესაძლებელი პოზიციების დაახლოება, იმიტომ, რომ ჩვენი პოზიცია არის ასახული იმ კანონპროექტში, რომელიც მიშელის დოკუმენტზე ხელმომწერმა ოპოზიციამ წარადგინა,“ – აცხადებს სალომე სამადაშვილი.
საკუთარი პირობა აქვს “სტრატეგია აღმაშენებელს”. ამის შესახებ პარლამენტის ფრაქცია “შარლ მიშელის რეფორმების ჯგუფის” თავმჯდომარის მოადგილე პაატა მანჯგალაძე საუბრობს.
“შეთავაზება იყო შემდეგი, რომ წინასწარი თანხმობის მუხლი ამოეღო “ქართულ ოცნებას” და ჩვენ ამოგვეღო მუხლი, რომელიც ითვალისწინებს დაზარალებულის თანხმობას. “სტრატეგია აღმაშენებელი” დაუჭერდა მხარს ამ კომპრომისს იმ შემთხვევაში, თუ დაზარალებულების მიმართ იქნებოდა მკურნალობის და რეაბილიტაციის თანხები გათვალისწინებული სახელმწიფო ვალდებულების სახით. ეს არის ჩვენი პირობა,“ – აცხადებს პაატა მანჯგალაძე.
