პრემიერ-მინისტრის გიორგი გახარიას განცხადებით, ონლაინ ვაჭრობით დაკავებულ კომპანიებს შეუძლიათ მიმართონ ეკონომიკისა და მდგრადგი განვითარების სამინისტროს და შესამისი შემოწმების გავლის შემდეგ, 27 აპრილიდან თავიანთი საქმიანობა გააგრძელონ.
გახარიას თქმით, „ყველა სახის ონლაინ ვაჭრობა არის გახსნილი ყველა იმ კომპანიისთვის, რომელმაც ელემენტარული შემოწმება გაიარა“.
„ასეთი კომპანიები ბევრია, ვინც ასეთი შემოწმებები გაიარეს. ამისთვის ეკონომიკის სამინისტრო არის ღია და მზად. როგორც კი მიმართავენ და ამ შემოწმებას გაივლიან, არანაირი პრობლემა არ იქნება. ყველა სახის ონლაინ ვაჭრობა, ისე როგორც მიტანის სერვისი, სრულად გაიხსნება ორშაბათიდან.
ჩვენ ძალიან კარგად გვესმის, ეს შეზღუდვა რამხელა დისკომფორტის მომტანი იყო, პირველ რიგში, ჩვენი მოქალაქეებისთვის და შემდგომ ამ კომპანიებისთვისაც, თუმცა თითოეულ ჩვენს მოქალაქეს მინდა მოვუწოდო, რომ უნდა ვიყოთ ძალიან ფხიზლად. ჩვენ თუ არ მივეცით რეაქცია და არ გამოვიჩინეთ მოქალაქეობრივი პასუხისმგებლობა, როდესაც დავინახავთ, რომ ვიღაც არაკეთილსინდისიერად ასრულებს თავის ფუნქციას, თუნდაც კურიერი, თუნდაც მძღოლი, ამ ყველაფერზე უნდა გვქონდეს გარკვეული რეაქცია. აქ არ არის საუბარი მხოლოდ ჩვენს ჯანმრთელობაზე, აქ საუბარია საზოგადოების ჯანმრთელობაზე“, – განაცხადა გახარიამ.
