კომერციული ნაბკები წელს სოლიდურ მოგებაზე გავლენ – ასეთი პროგნოზი ეროვნული ბანკის ფინანსური სტაბილურობის კომიტეტის დღევანდელ სხდომაზე გაკეთდა. მიზეზად კი საკრედიტო აქტივობის ზრდა და დარეზერვების მოცულობის შემცირება დასახელდა. ბანკების მოგებამ იანვარ-აპრილში უკვე 0.5 მლრდ-ს გადააჭარბა, რაც სებ–ის პროგნოზს რეალურს ხდის.
2019 წელს საბანკო სექტორის მოგებამ 853 მლნ ლარი შეადგინა, 2020 წელს მოგება 99 მლნ-მდე შემცირდა, თუმცა 2009 წლისგან განსხვავებით სექტორი მინუსში არ გასულა. ეკონომიკური კრიზისისა და საკრედიტო პორტფელის ზრდის ტემპის შემცირების გარდა მოგების კლებაზე მნიშვნელოვანი გავლენა დარეზერვებულმა თანხებმაც იქონია. კონსერვატული მიდგომით ბანკებმა შესაძლო დანაკარგები რეალურზე მეტად გაზარდეს.
2021 წელს მდგომარეობა მკვეთრად შეიცვალა, პირველ კვარტალში ბანკების მოგებამ 412 მლნ ლარს მიაღწია, მაშინ როცა გასული წლის ანალოგიურ პერიოდში ზარალი 747 მლნ ლარი იყო. ეს ის პერიოდია, როდესაც ბანკებმა მსესხებლებს სამთვიანი საშეღავათო პერიოდი მისცეს. მომხმარებელი დროებით ძირისა და პროცენტის გადახდისგან გათავისუფლდა და ვინც ამ შეღავათით ისარგებლა მის მიერ დარჩენილი გასასტუმრებელი თანხა მთლიანად რეზერვში გადამისამართდა. ადამიანთა უმრავლესობამ მხოლოდ მოგვიანებით აღმოაჩინა, რომ პროცენტის დარიცხვა საშეღავათო პერიოდშიც გრძელდებოდა და მათი სესხის მოცულობა საბოლოო ჯამში გაიზარდა.
აპრილში ბანკებმა დამატებით 173 მლნ-ის მოგება აჩვენეს და შედეგად პირველ ოთხ თვეში ჯამურად 584 მლნ-იან მოგებაზე გავიდნენ, რაც მთელი 2020 წლის მაჩვენებელს 5.9-ჯერ აღემატება.
ბანკების მოგების ზრდაზე დამატებითი გავლენა მაკროეკონომიკური გარემოს გაუმჯობესებამაც მოახდინა. 12 თვიანი ვარდნის შემდეგ მიმდინარე წლის მარტში პირველად ეკონომიკური ზრდა დაფიქსირდა. ბოლო ორი თვეა ტურიზმი სამნიშნა პროცენტული მაჩვენებლით იზრდება და მსოფლიო ბანკმაც საქართველოშტვის 2021 წლის ეკონომიკური ზრდის პროგნოზიც 6%-მდე გაზარდა.
