„რეალურად, გვაქვს უმნიშვნელოვანესი კურორტი და ქუთაისის აეროპორტი, როგორც დიდი ლოჯისტიკური ცენტრი, თუმცა ამ ორ ლოკაციას შორის პირდაპირი სატრანსპორტო მიმოსვლა არ არსებობს“, – ამის შესახებ „ბიზნესპრესნიუსთან“ Travel To Georgia-ს დირექტორმა და ახალგაზრდა გიდების ასოციაციის ხელმძღვანელმა, ლაშა ბერეკაშვილმა განაცხადა.
მისივე თქმით, ჯერ კიდევ არ არის გვიან, რომ ქუთაისისა და წყალტუბოს ერთ სატრანსპორტო ხაზში მოქცევა და დაკავშირება მოხდეს.
როგორც ლაშა ბერეკაშვილი განმარტავს, ამგვარი სატრანსპორტო კავშირის არარსებობა წყალტუბოში ტურიზმის განვითარებას მნიშვნელოვნად აფერხებს.
შესაძლებელი იყო ისეთი რეისის გაშვება, როგორიცაა: ქუთაისი-წყალტუბო-აეროპორტი ან აეროპორტი-წყალტუბო-ქუთაისი, რითაც ერთი მარშრუტით ამ ორი ქალაქის დაკავშირება მოხდებოდა.
ეს ნაბიჯი გარკვეულწილად გაზრდიდა კურორტის ცნობადობას და ტურისტებისთვისაც ხელშესახები იქნებოდა, რომ შატლი წყალტუბოში დასარჩენად გამოეყენებინათ.
თავის მხრივ, ეს ხელს შეუწყობდა ადგილობრივი მოსახლეობის მიერ ოთახების/ბინების გაქირავების მატებასაც. ფაქტია, რაც მეტი ტურისტი დარჩებოდა წყალტუბოში, მით მეტ სიკეთეს მოუტანდა ეს ადგილობრივებს.
ეს შესაძლებლობა აუცილებლად უნდა გამოგვეყენებინა, თუმცა, ახლაც არ არის გვიან. ქუთაისის აეროპორტი არსებობს და საჭიროა, მასზე წყალტუბოს მიმართულების დამატება.
გარკვეულწილად, ეს ტურისტებს აკარგვინებს წყალტუბოს. რეალურად, გვაქვს უმნიშვნელოვანესი კურორტი და ქუთაისის აეროპორტი, როგორც დიდი ლოჯისტიკური ცენტრი, თუმცა, ამ ორ ლოკაციას შორის პირდაპირი სატრანსპორტო მიმოსვლა არ არსებობს.
ამ პრობლემის მოგვარება იქნებოდა ერთი პატარა, მაგრამ წინგადადგმული ნაბიჯი, რომლითაც წყალტუბოს ინტერესების გათვალისწინება მოხდებოდა“, – განაცხადა ლაშა ბერეკაშვილმა.
„ახალგაზრდა გიდების ასოციაციის“ ხელმძღვანელმა ყურადღება კურორტზე არსებულ სხვა პრობლემებზეც გაამახვილა და მათ შორის, შეეხო წყალტუბოს ცენტრალურ პარკში არსებულ ინფრასტრუქტურულ გამოწვევებსაც.
„გარდა ამისა, კატასტროფულ მდგომარეობაშია ცენტრალური პარკი. იქ გავლა არა თუ უცხოელისთვის, ზოგ შემთხვევაში ადგილობრივებისთვისაც საშიშია, განსაკუთრებით ზაფხულში.
წელამდე ბალახია და ზოგან ადამიანსაც კი ფარავს. სკამები, ატრაქციონები, საფეხმავლო ბილიკები, განათების სისტემა – აბსოლუტურად ყველაფერი მწყობრიდანაა გამოსული.
წარმოიდგინეთ, საქართველოს პარკებს შორის ერთ-ერთ ყველაზე დიდ პარკზეა საუბარი, სადაც ასევე მდებარეობს უნიკალური სამკურნალო აბაზანები.
დღეს კი იქ ინფრასტრუქტურა დაზიანებულია და ბალახი ზოგ შემთხვევაში გაუვალი, რაც ტერიტორიაზე ქვეწარმავლების დაბუდების მიზეზი ხდება.
შესაძლოა, ამან ადამიანების სიცოცხლესა და ჯანმრთელობას პირდაპირი საფრთხე შეუქმნას“, – აცხადებს „ბიზნესპრესნიუსთან“ ლაშა ბერეკაშვილი.
