“ჩვენთვის ძალიან მნიშვნელოვანია, მკაფიოდ და პასუხისმგებლობით ვუპასუხოთ ყველა კითხვას, რომელიც ბოლო პერიოდში გაჩნდა:
2013 წლიდან დღემდე, ჩვენი კომპანია ქათმის წარმოებაში არ იყენებს ჰორმონულ დანამატებსა და სტეროიდებს. მსგავსი პრაქტიკა არ არსებობს არც ჩვენს, არც სხვა მეფრინველეობის ფერმებში საქართველოში, რადგან კანონი ამის გამოყენებას კრძალავს.
ჩვენი ქარხნისგან გამოტანილი ქათმის ნაკელი გამოიყენება მხოლოდ სასოფლო-სამეურნეო მიზნებისთვის — ნიადაგის გასანოყიერებლად და მცენარეების მოსავლელად. მისი გამოყენება ცხოველების ან ადამიანების საკვებად დაუშვებელია და მსგავსი პრაქტიკა კატეგორიულად აკრძალულია.„ჩირინა“ ამიერკავკასიაში ყველაზე დიდი მეფრინველეობის ფერმაა, რომელიც ფლობს სურსათის უვნებლობის არაერთ საერთაშორისო სერტიფიკატს. ეს სტანდარტები მკაცრად გვავალდებულებს, მომხმარებელს მივაწოდოთ ჯანსაღი, ხარისხიანი და უსაფრთხო პროდუქტი.
მადლობა ნდობისთვის და გვერდით დგომისთვის! ვაგრძელებთ ჩვენი საქმის კეთებას მაღალი პასუხისმგებლობით.” – წერს ბიუბიუს მწარმოებელი კომპანია ჩირინა.
„რადიო თავისუფლების“ მიერ 31 მარტს გამოქვეყნებული საგამოძიებო სტატიით გაირკვა, რომ რძის მწარმოებელი კომპანია „ყვარლის ბაგა“, რომელსაც ათასობით ძროხა ჰყავს, საქონლის გამოსაკვებად ქათმის სკინტლს იყენებდა. სასამართლოს მასალების მიხედვით, ერთი ძროხა დღეში დაახლოებით 6-7 კილო ქათმის ნაკელს ჭამდა. „ყვარლის ბაგის“ რძეს ყიდულობენ „სანტე“, „სოფლის ნობათი“, „აგროჰაბი“ და „ყვარლის ბაგის“ შვილობილი „რძის ლაბორატორია“.
ძროხების ქათმის ნაკელით გამოკვებაზე „რადიო თავისუფლებისთვის“ ცნობილი არ გახდებოდა, რომ არა „ყვარლის ბაგის“ მიერ „ჩირინას“ („ბიუ-ბიუს“) წინააღმდეგ დაწყებული სასამართლო დავა – რძის მწარმოებელი კომპანია სკინტლის გამყიდველს 2018-19 წლებში 200-მდე ძროხის დახოცვაში ადანაშაულებდა – ამტკიცებდა, რომ ნაყიდ ნაკელში ანტიბიოტიკი აღმოჩნდა.
ამავე თემაზე:
