კომპანიების SpaceX და Tesla დამფუძნებელმა და აღმასრულებელმა დირექტორმა, ილონ მასკმა გამოცემა Bloomberg-ის მიერ პერიოდულად გამოქვეყნებად მსოფლიოში უმდიდრესი ადამიანების სიაში უმსხვილესი ონლაინ მაღაზია Amazon-ის მფლობელ ჯეფ ბეზოსს გადაასწრო და პირველ ადგილზე გადაინაცვლა. მოცემული დროისთვის მისი ქონება 195 მილიარდ აშშ დოლარს შეადგენს.
რეიტინგში მეორე ადგილს 185 მილიარდი აშშ დოლარით სწორედ ჯეფ ბეზოსი იკავებს. მესამე პოზიციაზე Microsoft-ის დამფუძნებელი ბილ გეითსია, რომლის ქონებაც ბოლო მონაცემებით 134 მილიარდ აშშ დოლარს შეადგენს, მეოთხე ადგილს კი 116 მილიარდი აშშ დოლარით კომპანიათა ჯგუფის Moët Hennessy – Louis Vuitton დირექტორთა საბჭოს თავმჯდომარე, ბერნარ არნო სჯერდება. რაც შეეხება Facebook-ის დამფუძნებელსა და აღმასრულებელ დირექტორს, მარკ ცუკერბერგის ქონება 102 მილიარდ აშშ დოლარადაა შეფასებული და ის სიაში მეხუთე პოზიციაზეა. აღსანიშნავია, რომ მსოფლიოს უმდიდრესი ადამიანების პირველ ხუთეულში ტექნოლოგიური კომპანიების ოთხი დამაარსებელი და ხელმძღვანელია, ათეულში კი სულ შვიდი ასეთი პიროვნებაა.
სამხრეთაფრიკული წარმოშობის მილიარდერმა Amazon-ის მფლობელი უკან Tesla-ს აქციების ფასის 7,9 პროცენტით გაზრდის შემდეგ ჩამოიტოვა. ამის მიზეზად ექსპერტები გასული წლის დეკემბერში ელექტრომობილების მწარმოებელი კომპანიის ყველაზე მაღალი კაპიტალიზაციის მქონე ამერიკული კორპორაციების ჩამონათვალში შესვლას ასახელებენ, რის შედეგადაც ის საფონდო ბირჟის ინდექსს S&P 500 დაემატა. აღსანიშნავია, რომ ჯეფ ბეზოსი, რომელიც Amazon-თან ერთად ყოველდღიური გამოცემის The Washington Post და კოსმოსური ხომალდების მწარმოებელი კომპანიის Blue Origin დამაარსებელიცაა, მსოფლიოს ყველაზე მდიდარი ადამიანის სტატუსს 2017 წლიდან ამ დრომდე უცვლელად ინარჩუნებდა.
ილონ მასკი 2020 წლის დასაწყისში მსოფლიოს უმდიდრესი ადამიანების სიაში 37-ე ადგილს იკავებდა. აღნიშნული პერიოდიდან წლის ბოლომდე მის კაპიტალს ჯამში 165 მილიარდზე მეტი აშშ დოლარი დაემატა, რაც დიდწილად სწორედ Tesla-ს აქციებზე ფასის ზრდამ განაპირობა. კომპანიის ფასიანი ქაღალდების ღირებულება გასული წლის განმავლობაში 743 პროცენტით გაიზარდა, ივლისის თვეში კი ის მსოფლიოში ავტომობილების ყველაზე ძვირადღირებული მწარმოებელიც გახდა.
